BONIFATIUS episcopus servus servorum dei. Universis christi fidelibus presentes litteras inspecturis Salutem et apostolicam benedictionem. Licet is de cuius munere venit ut sibi a suis fidelibus digne et laudabiliter serviatur de abundantia sue pietatis que merita supplicum excedit et vota bene servientibus sibi multo maiora retribuat quam valeant promereri Nichilominus tamen desiderantes domino populum reddere acceptabilem et bonorum operum sectatorem fideles ipsos ad complacendum ei quasi quibusdam allectivis muneribus indulgentiis videlicet et remissionibus invitamus ut exinde reddantur divine gratie aptiores. Cupientes igitur ut Capella hospitalis pauperum sanctorum Blasii et Stephani Salzeburgensis congruis honoribus frequentetur ac Capella et hospitale huiusmodi etiam conserventur et pauperes ac infirmi et alie persone in eadem hospitali pro tempore degentes congrue sustententur et ut christi fideles eo libentius causa devotionis confluant ad eandem Capellam et ad eius ac dicti hospitalis conservationem necnon pauperum infirmorum et personarum huiusmodi sustentationem manus promptius porrigant adiutrices quo ex hoc ibidem dono celestis gratie uberius conspexerint se refectos de omnipotentis dei misericordia et beatorum Petri et Pauli Apostolorum eius auctoritate confisi, omnibus vere penitentibus et confessis qui singulis diebus Capellam dictam devote visitaverint annuatim, et ad conservationem ac sustentationem huiusmodi manus porrexerint adiutrices, qualibet videlicet die qua Capellam ipsam visitaverint et adiutrices manus porrexerint ut prefertur Quadraginta dies de iniunctis eis penitentiis misericorditer relaxamus. Volumus autem quod si alias visitantibus dictam Capellam vel ad eius fabricam seu huiusmodi conservationem aut sustentationem manus porrigentibus adiutrices vel alias inibi pias elemosinas erogantibus aut alias aliqua alia indulgentia imperpetuum vel ad certum tempus nondum elapsum duratura preter illam quam alias visitantibus predictam Capellam certis tunc expressis diebus, et ad huiusmodi conservationem et sustentationem manus porrigentibus adiutrices concessimus videlicet Quinque Annorum et totidem Quadragenarum per nos concessa fuerit presentes littere nullius existant roboris vel momenti. Datum Rome apud Sanctum Petrum VI Nonas Maii Pontificatus nostri Anno Decimo. Gratis de mandato domini nostri pape. (Scriptor): Jo de Tremosnicz

Source Fulltext: Peter Peusquens, Karlsruhe