++ Philippus dei gratia Romanorum rex et semper augustus++. Ea que rationabiliter acta sunt, ne longa temporum successione a memoria hominum elapsa contingat evanescere, vivaci scriptorum memoria decet et congruum est perhennari. Ob memoriam itaque rei geste ad noticiam universorum tam presentis etatis quam in eorum successure posteritatis hominum deduci volumus, qualiter constitutis in presencia regie maigestatis dilecto fideli nostro Eberhardo venerabili Salzpurgensis ecclesie archiepiscopo et Heinrico comite de Lechesgemunde evidentissima veritatis expressione nobis est monstratum, quod inter dominum Cvnradum quondam Salzpurgensem archiepiscopum et memoratum H(einricum) tunc comitem de Matrei precariis quibusdam intercedentibus sub eo pretextu contractus quidam fuit ordinatus, videlicet quod ipse castrum Matrei cum omnibus pertinentiis suis et insuper universas possessiones tam ex paterna quam ex materna hereditate iure videlicet proprietatis ad ipsum spectantes tam in castris quam in villis quam in ministerialibus quam in feudis Salzpurgensi ecclesie libere et absolute contradidit usufructu tamen tempore vite sue sibi reservato, econtra vero Salzpurgensis ecclesia usufructum quarundam decimarum et quorundam mansuum sibi concessit, proprietate tamen sibi reservata. Quibus possessionibus cum diucius frueretur tam propriis primo quam ecclesiasticis, ne exinde ulla imposterum Salzpurgensi ecclesia ambiguitatis nota moveri posset, placuit utrique tam predicto comiti quam ecclesie Salzpurgensi domino Eberhardo secundo tunc illi ecclesie presidente, ut iam dictus comes usufructui cederet tam in rebus propriis quam ecclesiasticis usufructu cum proprietate relicto Salzpurgensi ecclesie quadam summa peccunie pro tali cessione recepta. Ob plenam itaque Salzpurgensis ecclesie cautelam in presencia maigestatis regie sepedictus comes castrum Matrei cum attinentibus sibi ministerialibus possessionibus et villis tam dominicalibus quam infeudatis tam cultis quam incultis et, ut breviter concludamus, omnia sibi attinentia tam paterna quam materna hereditate iure proprietario Salzpurgensi ecclesie resignavit cum proprietate et usufructu. Idem fecit in rebus ecclesiasticis sibi precario concessis peccuniam quoque remisit, qua ei Salzpurgensis ecclesia ab antiquo obligata fuit, pro qua quasdam decimas habuit obligatas et sic et pecuniam dimisit et pignus reddidit. Ecclesia tamen in premium eorum que fecit castrum in Lengeberch cum sibi attinentibus et unum solum nomine Lôshant reddidit sibi ministerialem. Denique ut omnem questionis scrupulum rei geste sepedictus comes elideret, donationem ab antiquo Salzpurgensi ecclesie factam in presencia regalis magnificencie recognovit et eandem donationem denuo libera voluntate innovavit. Hanc igitur donationem rite et rationabiliter in presencia nostra factam approbamus et regia auctoritate confirmamus statuentes et regia sanctione firmiter precipientes, ut nulli de cetero persone alte vel humili ecclesiastice vel seculari hanc nostre confirmationis divalem paginam licitum sit infringere seu aliquo ei temeritatis ausu obviare. Quod qui facere presumpserit, C libras auri in sue presumptionis penam conponat, quarum medietas fisco nostro, residua vero medietas iniuriam passis assignetur. Testes autem huius rei sunt: Albertus Maideburgensis archiepiscopus, Conradus Spirensis episcopus, Conradus Haluerstadensis episcopus, Bernardus dux Saxonie, Didericus marchio Missenensis, Heinricus dux Louanie, Ludewicus dux Bawarie, comes Burkardus de Mannesfeld, comes Fridericus de Bîchelingen, comes Lampertus de Glîche, comes Heinricus et frater suus de Keuerenberc, Heinricus dapifer et frater suus de Walpurc, Heinricus marscalcus de Kallendin, Heinricus de Smalnekke, Heinricus camerarius et alii quam plures. Dat. apud Quithelineburc, anno domini M°CC°VII°, X°kalend. octobris, indict. XI.||
S.^a)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 95-97.