Innocentius episcopus servus servorum dei venerabili fratri . . Salzeburgensi archiepiscopo salutem et apostolicam benedictionem. Dilectis filiis O(ttone) Gurcensi preposito pro parte capituli sui et K. [pro]curatore tuo in nostra presentia constitutis pro Gurcensi capitulo fuit propositum coram nobis, quod vacante ipsorum ecclesia tu ab eis ad electionem vocatus demum post multas voc[a]tiones ad eorum ecclesiam post duos menses circa finem tertii accessisti et ad tue petitionis instantiam quodam autentico scripto¹⁾ super electionis faciende processu tibi et [successoribus tuis]^a) ab apostolico sede concesso exhibito coram multis et super hac clausula videlicet „ecclesie gremio" inter te ac partem alteram questione suborta, cum illi circa ipsum capitulum tan[tum] illius clausule restringerent intellectum, tu vero tam ad capitulum quam etiam ad Gurcensem diocesim nec non et totum Salzeburgensem provinciam ampliares, ad denom[i]nationem procedere noluisti, eo quod tecum in talem interpretationem convenire nolebant. Quapropter iidem per appellationis remedium ad subsidium sedis apostolice convolarunt protectioni nostre se ac iura Gurcensis ecclesie supponentes. Dictus autem procurator tuus proposuit ex adverso, quod^b) ad ecclesiam accesseris memoratam prudenti deliberatione considerans, quod talis erat in pontificem nominandus, qui et illi prodesse posset ecclesie ac in tota Salzeburgensi provincia efficaciter vicarii officium adimpleret, rogavisti prepositum et canonicos Gurcensis ecclesie, ut tibi de ipsorum canonicum meritis plenam notitiam non haben[ti] denominarent aliquos, quos ad tantum honorem et onus crederent esse dignos, non quod teneris ex denominatis ab ipsis aliquem nominare, sed ut nominatorem meritis et circumstantiis aliis circumspectis aut de ipso capitulo, si forsan ibi repperiretur idoneus vel etiam de diocesi eligendum aliquem nominares, interpretans clausulam supradictam capituli Gurcensis ecclesie ac totius diocesis complexivam. Appellantibus itaque propter hoc ad sedem apostolicam preposito et capitulo supradictis appellationi eorum humiliter detulisti. Auditis igitur hiis et aliis propositis coram nobis sic duximus providendum, quod, nisi sub ha[c] forma poterit electio provenire, videlicet ut denominatis a te infra mensem tribus personis una^c) de ipso Gurcensi capitulo et duabus extraneis unam ex ipsis tribus sibi prepositus et canonici elegerint in pastorem, extunc usque ad festum omnium sanctorum proximo futurum tu et prepositus memoratus personaliter nostro vos conspectui presentetis et idem prepositus aliquos de ipso capitulo secum ducat, quos ad tautum onus et honorem idoneos reputabit, ut ipsum negotium in nostra presentia finem debitum sortiatur. Quocirca fraternitati tue per apostolica scripta mandamus, quatinus iuxta formam premissam in negotio procedas eodem. Tu denique frater archiepiscopo super te ipso et credito tibi grege taliter vigilare procures extirpando vitia et plantando virtutes, ut in novissimo districti examinis die coram tremendu iudice, qui reddet unicuique secundum opera sua, dignam possis reddere rationem. Dat. Lateran. XV kal. iulii, pontificatus nostri anno sextodecimo.^d)||
BD.

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S.167-169.