Wir Albrecht von gotes gnaden hertzog ze Osterich und ze Steyr veriehen und tuen chunt allen den, di disen brief sehent oder horent lesen, daz ez zwischen unserm herren dem ertzbischolf Chvnraten von Saltzburch und zwischen uns getaidingt ist, daz alle strazze ouf dem lande und ouch ouf wazzer offen sulen sin und da hin gen, da si van alter hin gegangen sint. Ouch ist iz geredêt, daz dem vorgenantem ertzbischolf von Saltzburch sin tael an der moutt ze Rotenmanne ledich sol sein und swaz Sibot von Lampoltinge in dem urleug in hat genomen, van demselben tael oder swaz er anders getan hat in dem urleug, des sol er ledich sin, van dem aber, daz er vor dem urleug in genomen hat, da sol er van recht raitunge tuen dem vorgenanten ertzbischolf von Saltzburch. Des geben wir ze einem urchunde disen brief versigelt mit unserm insigel. Der brief ist gegeben datz Lintze an dem ahtendem tag nach phingsten, da van Christes geburd waren tausent zwai hundert iar und in dem drin und neuntzigistem iar.||
SD.

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 213.