Nos Vlricus dei gracia comes de Phannberch tenore presencium profitemur et constare volumus universis tam presentibus quam futuris hanc litteram inspecturis, quia nos ex intimis animi nostri desideriis affectamus ac multis affectavimus temporibus reverendi in Christo patris et domini nostri domini Chunradi Salzburgensis archiepiscopi ac ecclesie sue captare graciam et favorem eorum promocionem et amiciciam bona fide et nostris voluntariis obsequiis non solum augere cupientes sed eciam in omnibus conservare, quod castra seu municiones Ramstain, Loschental et Lauentmund et liberam proprietatem, que nobis compeciit in eisdem una cum eorum attinenciis, quarum ad presens possessores sumus aut esse poterimus in futurum vel que nobis ex iure hereditario cedere potuerunt tam de donis, que wlgariter leibgedinge dicuntur, dilecte matris nostre domine Agnetis ac domine Elizabet consobrine¹⁾ nostre quam ex causis aliis quibuscumque quesitis et inquirendis feodatis et non feodatis in homagiis hominibus nobilibus ignobilibus seu colonis in prediis sive bonis forestis silvis aquis sive fluviis pascuis venacionibus piscariis honoribus libertatibus ac aliis iuribus quocumque nomine censeantur super altare sancti Rudberti in Salzburga iuxta iusticie debitum et approbatam conswetudinem nec non ad manus prefati domini nostri Salzburgensis archiepiscopi pro se et ecclesia sua recipientis simpliciter resignamus liberaliter transferimus et donamus nichil penitus in premissis iuris aut proprietatis nobis aut nostris heredibus reservantes. Et in premissorum recompensam sepefactus dominus noster argenti marcas sex et denariorum Aquilegensium marcas sexaginta, cum quibus nunc apud Luentz obsides nostros stantes in obstagio exsolvere tenebitur, nobis tribuit et donavit daturus nobis insuper argenti marcas trecentas in nativitate Domini ventura proxime persolvendas, qua pecunia pro relevandis debitorum nostrorum oneribus et ad tollendum dampna gravissima, que destruccionem nostram et dispendium inportassent specialiter indigemus. Prenotatus eciam dominus noster archiepiscopus Salzburgensis premissas statim municiones sive castra cum omnibus eorum attinenciis ut predictum est nobis et nostris heredibus titulo contulit feodali, propter quod eidem promisimus et prestitimus iuramentum ad faciendum et dimittendum omnia, que secundum debitam reverenciam et bonam consuetudinem a vasallis apud veros et iustos dominos facienda sunt in omnibus ac eciam dimittenda. Obligamus insuper nos ac heredes nostros ad defendendum municiones premissas cum omnibus eorum attinenciis prenotatis iusticia mediante ac omni studio et modo, quibus melius possumus domino nostro ac sue ecclesie memoratis nec in eisdem et de eisdem municionibus attineneiisque eorum nichil facere, ex quo vel per ipsa vel occasione ipsorum detrimentum dampna labores et expensas aliquas paciantur. Ad hec promittimus firmiter pro nobis et heredibus nostris predicta omnia et singula nos rata firma et grata perpetuo servaturos nec contra venire vel facere aliqua racione vel causa de facto vel de iure nec eciam contra venienti in aliquo consentire. In quorum omnium premissorum evidentem cautelam et testimonium presentes donamus litteras roboratas munimine sigillorum nostri ac domini Nycolai militis de Grætz nec non venerabilis viri domini Friderici Salzburgensis ecclesie prepositi et nobilium virorum dominorum Hainrici de Radekk, Rudolfi de Vansdorf, Chunradi Chuchlærii et Chunonis de Teising. Datum Salzburge anno domini millesimo trecentesimo, XV° kalend. iunii, hoc est in vigilia ascensionis domini.||
SD. S.^a) SD. S.^b) SD. S.^c) S.^d)

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 258-259.