Wir Otte und Chvnrat brueder von Oberndorf vergehen und tun chunt an disem brief allen den, die in sehent oder horent lesen, daz wir mit unserem guten und vreien willen in unsers lieben herren gewalt des ertzpischolf Chvnrates von Salzburch gegeben haben leut und gu/ot aigen und lehen und allez, daz wir haben swie daz genant ist, daz uns von unserem vater hern Chunrat von Oberndorf, dem got genade, und von anderen unsern vorderen angevallen ist, daz er damit schaffe swaz sein genad sein. Wir suln ouch deheinen gewalt haben die vorgenanten leut und gut lehen und aigen ze versetzen, ze verchouffen noch mit nichteu verchumberen noch an werden noch mit abnemen noch mit stiften noch enstiften und sulen durchslehtes da mit niht ze schaffen haben noch dehain vorderunge hintz dem haben, swem ez unser herre der ertzpischolf enphilhe, und sulen denselben mit nihteu irren und sulen sein dehainen nutz haben wan swaz uns unser herre der ertzpischolf schaffet, des sol uns genu/ogen. Swaz wir dawider tæten, daz sol dehain chraft haben, wand wir sein ungewaltich sein ze tun. Wir haben ouch dem vorgenanten unserem herren unser treuwe gegeben in aides weis und haben gesworen die selben treuwe zebehalten als ouch ich Otte mich des im und dem gotshous êmalen verpunden han mit sampt minem vater mit hantfesten, die dar uber geschriben sint, daz wir mit dinst und mit triwen und mit gehorsam nimmer von im und von sinem gotshous ze Salzburch chomen sulen und dehain ander herschaft mit nihteu suchen noch nemeu wellen noch sulen und alle unser sache ninder anderswa ziehen wan fu/er unseren herren von Salzburch und fur sein capitel und fur unser housgenozzen, die daz gotshous an gehorent, swaz wir ze vorderen hieten an unseren herren ertzpischolf Chvnraten oder an sein nachchomen oder an daz gotshous ze Salzburch oder er und sein gotshous gegen uns. Ich Otte sol ouch nach mins herren gebot swa sein gnade ist varen ze dinen zu swelhem herren er mich haizzet varen und von demselben herren nimmer chomen an mines herren urloup von Salzburch. Und daruber ob wir paide bruder iht uberfuren der vorgenanten gelubde und da wider tæten, so sol allez, daz wir haben aigen und lehen in des gotshous lande und gebiet und anderswa, unserem herren ertzpischolf Chvnraten und sinem gotshous ze Salzburch ledich sein und sol er oder sin nachchomen damit tun swaz ir wille ist. Und sint des gezeuge und habent ouch ir insigel an disen brief gegeben her Friderich der tumbrobst ze Salzburch, her Ru/eprecht der abte von sand Peter, Chvnrat von Chuchel, Gerhoch von Radekk, Herman von Perchaim, Chvn von Teysingen, Albrecht von Truhtlerchingen, Heinrich von Prunninge und ander biderb leut. Und daz diseu gelubde von uns stete und unzebrochhen also beleiben, so han ich Otte min insigel für mich, ich Chvnrat von Oberndorf daz mein an disen brief geleit. Und ist diser brief gegeben ze Salzburch nach Christes geburtte tousent dreuhundert iar und in dem vierdem iar darnach, des mitichen vor sand Mathiestage.||
S.^a) S.^b) S.^c) S.^d) S.^e) S.^f) S.^g) S.^h) S.ⁱ⁾ S.^k)

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 270-271.