Wir grave Walther von Sternberch veriehen an disem bri/ef und tun chunt allen den, die in sehent oder horent lesen, daz wir mit unserr vreunt rat mit gutem willen und ledichleich gegeben haben und verchouft unserm erwerem herren ertzpischolf Chunraten von Salzburch und sinem gotshous alle unser manschaft, die wir gehabt haben oberhalb Mu/erowe ouf bei der Mu/er, oberhalb Stubenberger Chætsche ouf durch den Graker und dazwischen ouf bei der Rædenten untz an den Chætsperch und von dem Chætsperge ze tal untz da deu Mallentein in die Liser rinnet bei Gemvnde und twerichs uber uls deu regen wazzer sagent und ouch alle die manschaft, die wir dazwischen haben an pergen oder in tal swer si von uns hab gehapt also daz er uns ie fuer die march geltes manschaft sol geben ein march gewegens wer silbers. Wær aber, daz uns dehain irrunge daran wrde von der leute lougen, die diseu lehen von uns gehapt habent, da sol uns der vorgenant unser herre an beholfen sein swa ez in sinem geriht leit und swanne wir imz zerledigen, so sol er uns gelten nach dem vorgeschoben chouffe. Man sol ouch die march geltes raiten nach herren gu/elte als ie gewonhait ist in der gebiet und ez leit. Wir veriehen ouch, daz wir die vorgenanten manschaft dem vorgenantem unserem herren von Salzburch oufgegeben haben willichlich in sein hant mit unser erben willen und haben uns daran dehain reht niht behalten. Wir weisen, ouch hern Otten von Lihtenstain, die Goldekker und alle die, die in der vorgenanten gebiet lehen von uns gehapt habent, mit diesem brie an den vorgenanten unseren herren ertzpischolf Chunraten von Salzburch und sein gotshous also daz si furbaz von im und seinen nachomen und seinem gotshous enphahen sulen alle deu lehen, die si von uns gehabt habent in den vorgenanten gegenden als von ir rehtem lehen herren. Des sint gezeuge: her Otte von Lihtenstain, her Gerolt der vitztum ze Frisach, her Nicla von Stadowe, her Heinrich von Sternberch, her Otte der Bisweich, Hertweich an dem vreithof, Albreht der Vnnutze und Chunrat der Teruers und ander biderb leut genuge. Diser brief ist gegeben ze Mouterdorf^a) des næsten vreitages nach sand Erasemstage, do von Christes geburtte vergangen waren dreuzehenhundert und in dem vierdem iar darnach.||
S.^b)

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 273-274.