Wir Ott von Gotes gnaden Hertzog ze Osterreich vnd ze Steyr veriehen vnd tun chunt offenlich mit disem brief, Daz vnser getrewer Rudolf von Moln di erbern Erntrauten sein Eleicheu Hausfrowen mit vnsrer hant, gunst vnd guten willen geweiset hat vmb anderhalb hundert pfunt phenning wienner Munzze, di er ir ze rechter morgengab geben hat, auf den Hof ze Molen gelegen bei der Chirichen daselb, der von vns ze lehen ist, also daz si dieselben phenning haben sol auf dem selben Hof vnd auf allem dem vnd daizu gehort, besucht vnd vnbesucht, wie daz genant ist. Ob ouch der selbe Rud. von Moln also verfu^er, daz er mit der vorgenanten Erndrauten seiner Housfrowen nicht Leiberben gewunne, so sol si den vorgenanten Hof mit allen rechten vnd nu^eczen, als vor benant ist, innhaben vnd niezzen geru^ebichlichen an alle irrung als lange, vntz daz er vmb als vil gutes, das ist vmb anderhalb hundert phunt phenning der egenanten Munzze von ir oder swem si di schaffet, geloset wirt gar vnd genczlich, si mag ouch di vorgenanten anderhalb hundert pfunt auf dem selben Hof schaffen oder geben, wem si wil vnd sol sei daran niemant irren, vnd daruber zu einem offen vrchunt geben wir in disen brief versigelten mit vnserm Insiegel, Der geben ist ze wienne an samtztag nach sand Agnesen tag, Do man zalt von Christes geburde dreutzehen hundert iar, dar nach in dem dreu vnd dreizkistem iar.

Source Fulltext: OÖUB 6 (Wien 1872) S. 83f., Nr. 74