Oliverius Sabinensis, Johannes Portuensis, Georgius Albanensis et Jeronimus Penestrinensis episcopi, Dominicus tituli sancti Clementis, Ludouicus Johannes tituli sanctorum quatuor coronatorum, Laurentius tituli sancte Cecilie, Antoniotus tituli sancte Praxedis, Johannes tituli sancte Susanne, Baptista tituli sanctorum Johannis et Pauli, Johannes Antonius tituli sanctorum Nerei et Achilei, Bernardinus tituli sancte crucis in Iherosolima, Johannes tituli sancte Marie trans Tiberim, Johannes tituli sancte Prisce, Guillielmus tituli sancte Pudenciane, Dominicus tituli sancti Nicolai inter ymagines, Petrus tituli sancti Ciriaci, presbiteri, Franciscus sancti Eustachij, Raphael sancti Georgy ad velum aureum, Johannes sancte Marie in dompnica, Fodericus sancti Theodori, Julianus sanctorum Sergy et Bachi, Alexander sanctorum Cosme et Damiani, diaconi, miseratione diuina sacrosancte Romane ecclesie cardinales, vniuersis et singulis Christi fidelibus presentes litteras inspecturis salutem in domino sempiternam. Quanto frequentius fidelium mentes ad opera caritatis inducimus, tanto salubrius animarum suarum saluti consulimus. Cupientes igitur ut parrochialis ecclesia sanctorum Petri et Pauli apostolorum in Stregn Patauiensis diocesis, ad quam sicut accepimus honorabiles uiri parrochiam ipsius ecclesie singularem gerunt deuotionem, congruis frequentetur honoribus et a Christi fidelibus iugiter ueneretur ac in suis structuris et edificijs debite reparetur conseruetur et manuteneatur, necnon libris calicibus luminaribus ornamentis ecclesiasticis ac rebus alijs diuino cultui necessarijs decenter muniatur, utque Christi fideles ipsi eo libentius deuotionis causa confluant ad eandem, et ad reparationem conseruationem manutentionem ac munitionem huiusmodi manus promptius porrigant adiutrices, quo ex hoc ibidem dono celestis gratie uberius conspexerint se refectos, nos cardinales prefati uidelicet quilibet nostrum per se de omnipotentis dei misericordia ac beatorum Petri et Pauli apostolorum eius auctoritate confisi omnibus et singulis Christi fidelibus utriusque sexus uere penitentibus et confessis, qui dictam ecclesiam in sanctorum Petri et Pauli apostolorum et natiuitatis beate Marie virginis ac conuersionis sancti Pauli necnon sancti Gregory ipsiusque ecclesie dedicationis festiuitatibus et diebus a primis vesperis usque ad secundas vesperas inclusive deuote uisitauerint annuatim, et ad premissa manus porrexerint adiutrices, pro singulis festiuitatibus et diebus prefatis quibus id fecerint, centum dies de iniunctis eis penitentijs misericorditer in domino relaxamus, presentibus perpetuis futuris temporibus duraturis. In quorum fidem premissorum litteras nostras huiusmodi fieri nostrorumque sigillorum iussimus appensione conmuniri. Datum Rome, in domibus nostris, anno a natiuitate domini milesimo quingentesimo, die uero decima octaua mensis Nouembris pontificatus sanctissimi in Christo patris et domini nostri domini Alexandri diuina prouidentia pape sexti anno nono. ||
N. Lepe.t.

Source Fulltext: BURGER, Urkunden Altenburg (=FRA II/21, 1865) S. 362-363