Iohannes, miseracione divina sancti Angeli sacrosancte Romane ecclesie dyaconus cardinalis, in Germanie et nonnullis aliis partibus apostolice sedis a latere legatus specialiter deputatus, universis et singulis Christi fidelibus presentes litteras inspecturis salutem in Domino sempiternam.||
Primigenitus Dei filius Christus Ihesus dominus noster, quem ineffabilis sui patris sapiencia pro lapsu generis humani mirabili redempcione sui formam assumere et tandem sue peregrinacionis peracto tempore per proprii atque preciosissimi sangwinis aspersionem in salutiferi (!) crucis arbore victimari voluit, preflagrabile nobis exemplum contulit ac nobis quamquam quibuslibet immeritis suas in terris vices committere dignatus est, commissi per eum nobis gregis eterne vigilantes saluti curam solicitam atque solerciam possibilem impendamus, ut, quos tenebrarum principis antiqui eiusdem gregis adversarii seducit malignitas, per salutarem suorum excessuum detestacionem ac sanctorum et commendabilium operum exhibicionem ad ipsum Ihesum Christum dominum nostrum reducere studeamus ipsos ad illius, qui eos precio redemit ineffabili, impetrandi misericordiam donis spiritualibus, indulgenciis videlicet et remissionibus, salubriter irritantes. Cupientes igitur, ut monasterium Sancte Crucis in Austria Cisterciensis ordinis Pataviensis diocesis congruis frequentetur honoribus et a Christi fidelibus iugiter veneretur ac eciam conservetur et ut Christi fideles ipsi eo libencius causa devocionis confluant ad dictum monasterium et ad eius conservacionem et manutencionem manus prompcius porrigant adiutrices, quo ex hoc ibidem uberius dono celestis gracie conspexerint se refectos, de omnipotentis Dei misericordia et beatorum Petri et Pauli apostolorum eius auctoritate confisi omnibus vere penitentibus et confessis, qui in Nativitatis, Circumcisionis, Epiphanie, Resurreccionis, Trinitatis, Ascensionis et Corporis domini nostri Ihesu Christi ac Penthecostes necnon Nativitatis, Annuncciacionis, Purificacionis et Assumpcionis, Concepcionis, Visitacionisque beate Marie Virginis, Nativitatis beati Iohannis Baptiste, beatorum Petri et Pauli apostolorum, Bernhardi, Benedicti et ipsius monasterii dedicacionis ac patronorum, Invencionis et Exaltacionis Sancte Crucis Omniumque Sanctorum festivitatibus et celebritate ac per ipsarum festivitatum octavas devote visitaverint annuatim et ad reparacionem et conservacionem calicumque, librorum et aliorum ornamentorum pro divino cultu inibi neccessariorum quandocunque et quocienscunque manus porrexerint adiutrices, nos cardinalis et legatus prefatus pro qualibet dictarum festivitatum celebritate centum dies indulgenciarum de iniunctis eis penitenciis misericorditer in Domino relaxamus presentibus vero perpetuis temporibus duraturis et nichilominus omnes et singulas indulgencias, quas alii cardinales, legati, episcopi et archiepiscopi dandas decreverint ad dictum monasterium approbamus et ex certa sciencia confirmamus et presentis scripti patrocinio communimus. In quorum fidem et testimonium premissorum presentes litteras per secretarium nostrum infrascriptum subscriptas fieri nostrique sigilli iussimus et fecimus appensione communiri.||
Datum Wienne Pataviensis diocesis sub anno de nativitate Domini millesimo quadringentesimo quadragesimo octavo, indiccione undecima, die vero vicesima secunda mensis Februarii, pontificatus sanctissimi in Christo patris et domini nostri domini Nicolai divina providencia pape quinti anno primo.