Nicolaus episcopus, servus servorum Dei, dilecto filio .. preposito ecclesie sancti Martini in Posonio Striguniensis diocesis salutem et apostolicam benediccionem.||
Conquesti sunt nobis .. abbas et conventus monasterii Sancte Crucis de Sancta Cruce (!) Cisterciensis ordinis Pataviensis diocesis, quod venerabilis frater noster episcopus Iauriensis ac prepositus et capitulum ecclesie Iauriensis super quibusdam decimis et rebus aliis ad dictum monasterium legitime spectantibus iniuriantur eisdem, ideoque discrecioni tue per apostolica scripta mandamus, quatinus vocatis, qui fuerint evocandi, et auditis hinc inde propositis, quod iustum fuerit, appellatione remota decernas, faciens quod decreveris ab episcopo auctoritate nostra, ab aliis vero predictis per censuram ecclesiasticam firmiter observari. Testes autem, qui fuerint nominati, si se gratia, odio vel timore subtraxerint, censura simili appellatione cessante compellas veritati testimonium perhibere.||
Datum Rome apud Sanctum Petrum, anno incarnationis Dominice millesimo quadringentesimo quadragesimo nono, quinto Id. Martii, pontificatus nostri anno tertio.