Iohannes Miseracione diuina Sancti Angeli Sacrosancte Romane Ecclesie diaconus Cardinalis in Germania et nonnullis aliis partibus Sedis apostolice de latere legatus Vniuersis et singulis Christi fidelibus presentes litteras inspecturis Salutem in domino sempiternam. Splendor paterne glorie qui sua mundum illuminat ineffabili claritate pia vota fidelium de ipsius clementissima maiestate sperancium tunc precipue benigno fauore prosequitur cum deuota ipsorum humilitas sanctorum precibus et meritis adiuuatur. Cupientes igitur ut monasterium sancti Georgii in herczagnburga Canonicorum ordinis Sancti Augustini et Capella Sancti Michaelis ei annexa Patauiensis diocesis congruis frequentetur honoribus fidelesque ipsi eo libencius deuocionis causa confluant ad easdem quo ibidem dono celestis gracie vberius conspexerint se refectos a Christi quoque fidelibus iugiter veneretur De omnipotentis dei misericordia ac Beatorum Petri et Pauli apostolorum eius auctoritate confisi omnibus et singulis vere penitentibus et confessis qui dictum Monasterium et Capellam in Natiuitatis Circumcisionis Epiphanie Resurrectionis Ascensionis Penthecostes et Corporis domini nostri IHesu Christi nec non Natiuitatis Annunciacionis Purificacionis et Assumptionis Beate Marie semper Virginis ac Natiuitatis beati Johannis baptiste Beatorum Petri et Pauli apostolorum Omniumque Sanctorum, ac Sancti Georgii et Sancti Micaelis predictorum et ipsarum ecclesie monasterii predicti et Capelle dedicacionum festiuitatibus et celebritate, deuote visitauerint annuatim, et ad reparacionem et conseruacionem Calicum librorum et aliorum ornamentorum pro diuino cultu inibi necessariorum quocienscunque manus porrexerint adiutrices Nos Cardinalis et legatus prefatus pro qualibet ipsarum festiuitatum et celebritate Centum dies indulgenciarum de iniunctis eis penitenciis misericorditer in domino relaxamus, presentibus vero perpetuis temporibus duraturis. In Quorum fidem et testimonium presentes litteras fieri nostrique Sigilli jussimus et fecimus appensione communiri. Datum Wiene Patauiensis diocesis Sub Anno a Natiuitate Domini Millesimo Quadringentesimo quadragesimo septimo Indiccione decima die vero quinta mensis Nouembris Pontificatus Sanctissimi in Christo Patris et Domini nostri Domini Nicolai Diuina Prouidencia pape Quinti Anno Primo. Io. vaultier.

Source Fulltext: FAIGL, Herzogenburg (Wien 1886) S. 473-474