Alexander episcopus seruus seruorum dei Dilectis filijs ... Abbati et conuentui Moriasterii de Chremsemonasterio ordinis sancti Benedicti Patauiensis diocesis Salutem et apostolicam benedictionem. Pie postulatio uoluntatis effectu debet prosequente compleri, ut et deuotionis sinceritas laudabiliter enitescat et utilitas postulata uires indubitanter assumat. Sane petitio uestra nobis exhibita continebat, quod bone memorie Vlricus Patauiensis Episcopus sui Capituli accedente consensu Ecclesiam de Puchirichin Patauiensis diocesis, in qua ius patronatus habetis, retinendam in usus proprios uobis et per uos Monasterio uestro, prout spectabat ad eum, pia et prouida deliberatione concessit, reseruata Vicario seruituro perpetuo in eadem pro sustentatione sua et ad debita procurationem diocesani Episcopi et alia onera supportanda de ipsius ecclesie prouentibus congrua portione, sicut in litteris inde confectis dicitur plenius contineri. Nos igitur uestris supplicationibus inclinati, quod ab eodem Episcopo super hoc pie ac prouide factum est, ratum et gratum habentes id auctoritate apostolica confirmamus et presentis scripti patrocinio communimus. Nulli ergo omnino hominum liceat hanc paginam nostre confirmationis infringere uel ei ausu temerario contraire. Siquis autem hoc attemptare presumpserit, indignationem omnipotentis dei et beatorum Petri et Pauli apostolorum eius se nouerit incursurum. Datum Viterbij II. Nonas Januarij, Pontificatus nostri Anno Quarto.

Source Fulltext: OÖUB 3 (Wien 1862) S. 569-570, Nr. VIII des Anhanges