"Dominicus(1) miseracione diuina tituli sancte crucis in Jerusalem presbiter cardinalis, dilectis in Christo fratri Andree Ryeder presbitero, preposito ac conuentui monasterij Slagensis, per prepositum gubernari soliti, ordinis Premonstratensis, Patauiensis diocesis, salutem in Domino. Pijs vestris supplicationibus nobis ex parte vestra porrectis, quantum cum Deo possumus fauorabiliter annuentes, ne vos uel aliquem vestrum, sicut dicitur, non est confessor proprius deputatus, oporteat aliquotiens necessitatis articulo confitendi occasione extra septa ipsius monasterij euagari, et unde salus queritur animarum, possit periculum aliqualiter imminere, auctoritate domini pape, cuius penitentiarie curam gerimus, discretioni uestre concedimus, quatenus liceat tibi preposito, ydoneum et discretum presbiterum in confessorem eligere, qui tua et cuiuslibet fratris seu canonici et conuersi dicti monasterij confessione diligenter audita, tibi et eis super peccatis, que sibi confitebimini, nisi forte talia fuerint, pro quibus merito sit sedes apostolica consulenda, prouideat de absolutionis debite beneficio et penitentia salutari, quotiens fuerit oportunum, presentibus post quinquennium minime valituris. Datum Rome apud sanctum Petrum, sub sigillo officij penitentiarie, V. jdus decembris, pontificatus domini Nicolai pape V anno quarto."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 330 (S 229), S. 357