Gotfridus dei gratia Abbas Admuntensis. et Reinbertus dei gratia Abbas Garstensis. Iudices ab apostolica sede delegati. Amen. Ab apostolica sede in mandatis recepimus. ut causam. que uertitur inter Abbatem de Sytansteten et Capitulum suum ex una parte. et inter Meinhardum et Rapotonem fratres de Prunsperch ex altera. super quibusdam prediis. terris. titulis et rebus aliis. partibus conuocatis debito fine terminaremus. Partes ergo legitime in forum Judenburch citauimus. termino peremptorio eis. sicut decuit. assignato. et in termino ipsis prefixo abbate coram nobis in iudicio comparente predicti fratres nec uenerunt. nec ydoneum pro se responsalem mittere curauerunt. unde eos pro contumaci absentia merito punire debuissemus. deferentes tamen propter hoc. ne subito sententiam nostram uideremur precipitasse. alium diem ipsis in Rotmange prefiximus. citantes eos secundo per litteras nostras. sed ipsi beneficio nostro ingrati. apostolicum mandatum spreuerunt. et ad secundam citationem coram nobis comparere contempserunt. Igitur propter duplicem contemptum. videlicet contumacem eorum absentiam. auctoritate. qua fungimur. in nomine patris et filii et spiritus sancti. prefatos fratres M. et R. excommunicamus. et ab uniuersis Christi fidelibus tamquam ab unitate ecclesie precisos euitare precipimus. Datum Rottmangen pridie kal. Febr.

Source Fulltext: RAAB, Seitenstetten (=FRA II/33, Wien 1870) S. 38-39