Ich Dietrich der Schenche von Dobra. tvn chvnt allen den. die nv sint vnd her nach chvnftich werdent, daz ich den ersamen herren apte Chvnraden von Sitansteten vnd der Samenvnge da selbe. han ze chavffen gegeben ein lehen auf dem Chirchperge bi der Chirchen avf sant Michelsperge. daz min was. vmb siben pfvnt wienner pfenninge. vnd miner havsfrowen vron Chvnegvnt ein pfvnt pfenninge ze leit chavffe. vnd ist daz geschehen mit der genanten miner havsfrowen hant, vnd mit mines svns Dietriches hant. vnd mit irr beider gvtem willen. mit sogetaner bescheidenheit, waer iemen. der her nach chriegen wolte nah dem selben lehen. der sol geben dem vor genanten herren apte Chvnraden oder sinen nachomen. vnd der Samenvnge drizzich pfvnt wienner pfenninge. ob er daz selbe lehen haben will, vnd swaz der vor genant apte Chvnrat vnd sin nahchomen an dem selben lehen. daz wir in willechliche ze chavffen haben gegeben. fvrbaz von iemen mit ansprache vnd von chriege schaden nement. den sol wir in ab tvn. vnd vnser erben. die wir haben vnd noch gewinnen. vnd svln si daz haben. vf allem dem gvt, vnd wir haben, swa ez gelegen ist. Daz in daz ewichliehe staete belibe von vns vnd von vnsern nahchomen. so han ich Dietrich apte Chvnraden vnd der Sammenvnge dar vber gegeben disen prief. gevestent mit minem Insigel. vnd mit der drier ritter Insigel. Hern Hertweiges. vnd hern Heinriches von dem wasen, vnd Herrn Heinriches von Horaw. Des sint gezevge. Her Otte von dem wasen. her Heinrich der Streler. Herman der Nevnberger. wolfker von dem wasen. vlrich vnd Friderich die pavzzen. alram der stiller. Dietrich, hern Heinriches svn von Horaw. daz ist geschehen. do von vnsers herren gebvrte waren. Tausent iar, zwei hundert Jar. in dem Oht vnd Nevnzigisten Jar. an vnser frowen abent zter Schidvnge.

Source Fulltext: RAAB, Seitenstetten (=FRA II/33, Wien 1870) S. 121-122