Ich Gvndaker von Starchenberch, tuen chunt allen den disen brief ansehent, daz der herre apt chvenrat von seiteinsteten, chriegt mit vron Chvnegvnden, Otachers havsvrawen von Stille, vmbe ein wis in dem reintal, der chriech ist also geendet, daz er, der apt von seitensteten, hat der vorgenanten vron chunegvnden, die selben wis in dem reintal, verlihen, ir vnd ir chinden, diu si pi Otacheren hat, ze ir tagen, vnd der chind tagen, ze einem zins, das si alle iar an sant Georien tag, von der vorgenanten solen dienen zwainzich phennig wienner munzze, Ob si dan zins versezze, des ich niht getrawe noh gelawbe, so sol diu oft genant wis vnser vrawen ze seitensteten an allen chriech vnd an alle ansprach ledich sein. Vber die red han ich den prief beziugt, mit meinem insigel.

Source Fulltext: RAAB, Seitenstetten (=FRA II/33, Wien 1870) S. 128-129