Ich Chvnrat Puchowe. vergich offenwar, vnd tuen hvnt allen den, di disen prief sehent, oder lesen horent. di nv lebent oder hernach chvmftig sint. Daz ich mit woluerdachten mvet. vnd mit meiner hausurowen Alhaiten, vnd mit aller meiner Erben guetleichen willen, vnd auch mit meiner gesweien. Chvnratz van Chukching vnd Lvdweiges van Ybsitz. vnd mit andere irre Erben guetleichen willen, dev halb Stameinmul daz Ibsitz. vnd dev drev halbev lehen auf der Hohenwart. vnd dev drev Nevreut in der swartzen Ibsitz, daz ich allez van dem Gotshaus datz Seydensteten ze lehen gehabt han. meinem herren Apt Gvndachern van Seydensteten. vnd seinem Gotshaus. wesucht vnd vnwesucht, mit allem Cehent, vnd mit allem dem. daz darzue gehort, ze veld vnd ze holtz. ledigleich vnd vnversprochenleich vmb vier vnd tzwaintzig pfunt pfenning wienner munzz. ze chaufen gegeben han, vnd auch ich derselben pfenning gantz vnd gar gewert pin. vnd daz dev red stet vnd vnzeprochen weleib. doruber gib ich vorgenanter Chvnrat Puchowe. meinem herren Apt Gundachern. vnd seiner Samnvng vnd seinem Gotshaus datz Seydensteten disen prief ze vrchund. westaetten mit meinem hangvndem Insigel vnd mit meins gesweien hern Fridreiches des Pfarrer van Aspach insigil. vnd mit hern Chonratz va Seisenekk des Lantrichter Inssigil. Des sint gezeug. Her Lybhart der Prior. her Otakcher. her Rueger van zavch. Her Alram van Reichkerstorf. her walther van Meilestorf, her vlreich der Pauzz. wolfker vam wasen. Rudolf van vgental. Ditreich van winden. Ditreich van Erbing. Alram vnd Hainrich vam wasen. Herman Eisenhof. Hainreich van Elling. Alram vnd Otakcher die Stiller, vnd ander pider leut genueg. Daz ist geschehen datz Seydensteten. do man tzalt van Christes gepurt. Tausent jar. drev hvndert jar. vnd dornach in dem ainem vnd Czwainzigisten jar. an sant Valenteins tag. Nach der Lichtmesse.

Source Fulltext: RAAB, Seitenstetten (=FRA II/33, Wien 1870) S. 170-171