Ich Fridreich dietzeit schaffer und verweser des hawses datz sand Jeronimus ze Wienn vergich fur mich und fûr mein Nachkomen offenleich mit dem brief daz mich die erbern mann Hanns der Zyrnast und Hanns der Mosprunner dietzeit baid ausrichter und volfurêr des geschêffts so Hanns der Arnstorffer dem Got genad getan verrichtet und gewert habent zehen phunt wienner phen-ning die derselb Hanns der Arnstorffer den becherten frawn datz sand Jeronimus geschafft hat alls dasselb geschêfft vor dem Rat der Stat ze Wienn mit erber kuntschafft ist und alls es in dem Statpuch ze einer ewigen gedechtnizz geschriben stet. Und sag auch ich fuer mich und fuer all mein Nachkomen und fuer die obgenanten frawn datz sand Jeronimus die vorgenanten zwen geschêfftherren und all Ir Erben der egenanten zehen phunt phenning gentzleich quidt ledig und los Mit urchund des briefs versigilten mit meinem aufgedrukchtem Insigil Geben ze Wienn an Mitichen vor Gotesleichnam tag Nach Kristi gepuerd viertzehenhundert jar darnach in dem Sybenten jar.

Source Fulltext: Peter Peusquens