Otacharus dei gratia Boemiae rex, dux Austriae, Styriae et Karinthiae, marchioque Moraviae, dominus Carniolae, marchiae Egrae ac Portusnaonis vniuersis officialibus et mutnariis, qui pro tempore fuerint in Austria instituti, gratiam suam et omne bonum. Zelo diuinae pietatis moti ecclesiae Ardacensis praeposito et capitulo eiusdem in restaurum et reconpensationem dampnorum, quae olim ab hominibus ducis Bavariae ipsa ecclesia pertulit in ornamentis, libris, calicibus et priuilegiis, quibus eadem ecclesia tunc temporis habundabat, hanc duximus gratiam de nostra regia munificencia liberaliter concedendam, vt iura et libertates, quibus est gauisa temporibus praedecessorum nostrorum ducum Austriae clarae memoriae, habeat et eisdem regni nostri temporibus plene gaudeat. Eo, quod nos illas ecclesiae, praeposito et capitulo memorato obseruare uolumus et ab omnibus aliis inuiolabiliter obseruari, propter quod vobis, uniuersis et singulis, damus firmius in mandatis et nostrae gratiae per obtentum, quatenus nullus uestrum praefatos, ecclesiam, praepositum et capitulum audeat uel praesumat in suis juribus seu libertatibus ipsis factis aliqualiter perturbare, sed ipsos ac eorum procuratores cum vino, victualibus seu rebus aliis sursum et infra, per aquas et terras pro eorum utilitatibus conducendis permittatis transire libere sine muta. Quicunque vero ex vobis praedictos scilicet ecclesiam, praepositum et capitulum contra huius inhibitionis nostrae mandatum praesumpserit impedire, in illum tamquam mandatorum nostrorum temerarium contemptorem, animaduersionis nostrae acrimoniam taliter conuertemus, quod aliis cedere poterit in exemplum, et, ut praemissa robur obtineant firmitatis, ipsis, praeposito et capitulo, praesentes litteras scribi fecimus, nostrorum sigillorum munimine roboratas. Datum in Znoyma anno domini millesimo CCLXXIII quintodecimo Calendas Julii.

Source Fulltext: FRIESS, Ardagger (AÖG 46, 1871) S. 482-483