Universis presentem paginam inspecturis frater C. dictus abbas de Wettingin¹ subscripte rei noticiam. Quoniam vita humana vapor est ad modicum parens, gesta in tempore mandantur testimonio scripturarum. Notum sit igitur tam presentibus quam superventuris, quod, cum H. de Raprethwiler cognomento Wandilber² predium in Vran³ ad preces hominum eidem predio attinentium cum omnibus appendiciis suis in remedium anime sue domui in Wettingen devotus fundator eiusdem domus traderet libere ac quiete possidendum, homines iam dicti predii questum magnum estimantes secularem dominationem evadere iuramento obligaverunt se claustro nostro fideles futuros in posterum et annuos census, quos iuxta estimationem propriam se daturos promiserant, singulis annis reddituros voluntarie ac devote. Preterea quod nullus ex ipsis aliene conditionis uxorem et que non esset de familia domus nisi forte liberam in coniugio sortiretur, eadem fide promiserunt. Quod si contrarium accidisset, in penam sui consensum in hoc prebuerunt, quod nulla proles transgressoris ad bona patris seu mobilia seu immobilia accessum habebit, sed eorum medictas ad claustrum, reliqua ad heredes patris pertinebit. Ius etiam hereditarium in bonis hominum nobis attinentium, sicut a principio statutum est, usque ad quartam generationem tantummodo devolvetur, ultra vero in remedium animarum ipsorum cedet claustro. Nos ergo annuentes ipsorum voluntati cum consensu conventus et fundatoris domus nostre H. bona et firma fide promittimus nunquam eos alienandos vel commutandos a ditione cla^vstri aliquo modo pro quocumque precio vel predio, ita sane si et ipsi in supradictis promissionibus fideles et stabiles perseverant. Ut autem sine timore sint, hoc adiecimus, quod, si forte I^us vel duo vel etiam X. instinctu nequicie sue contra voluntatem universitatis se nobis opponentes promissiones a se factas ausu temerario infringere presumpserint, nisi infra spacium dimidii anni ad consilium ceterorum in gratiam claustri redeuntes ultro satisfecerint, a promissione, quam universitati fecimus, exclusi erunt, et de ipsis tanquam presentis exortibus privilegii faciendi, quod nobis visum fuerit expedire, liberam nobis retinuimus potestatem. Ceteri vero tanquam fideles nostri omni libertate et immunitate sub tutela privilegii huius feliciter potientur. Ut autem hec rata et firma diutius perseverent, presens scriptum sigilli nostri munimine et fundatoris domus nostre iussimus roborari. Actum anno gratie M°.CC°XL°.II°.

Source Fulltext: Chartularium Sangallense III, Nr. 1303, S. 243-244.