[Ber.] dei gratia sancti Galli abbas¹ dilecto ac speciali clerico suo magistro R. de Esching(en)^a)2 salutem et affectuosam semper ad omnia [vol]untatem. Et si quamplura servitia fidelia et necessaria nobis et ecclesie nostre hactenus impenderitis, pro quibus non inmerito re[tri]butionem condignam sperare debeatis, illud tamen gratissimum nobis et acceptissimum obsequium, quod modo experti sumus per [vestre] fidelitatis diligentiam, omnia superexcellit precedentia et nos quodam singulari vinculo vobis obligat et astringit, [ut a]d omnem vestram voluntatem prompti semper esse debeamus et vestre promotioni intendere toto posse. Verum quod tam tardi [fuim]us in nuntiis mittendis, hec causa fuit, quod dominus episcopus Constantiensis³ ante adventum Tuferii iter arripuerat eundi in Bri[sgaud]iam⁴ et ad Renum⁵ ibique febre correptus nondum extitit reversus, a quo negotium super commissione monasterii Augiensis⁶ [inci]pere decrevimus sicut a capite. Capite enim edomito facilius membra cetera perdomantur, unde non potuimus, sicut expectaba[mus,] vobis quicquam certi super eventu ipsius negotii demandare. Hoc autem scitote, quod castrum de Megdeberc⁷ ad manus nostras ha[bemus] et decanum monasterii Augiensis cum aliis nuntiis solempnibus misimus versus Vlmam⁸ pro naciscenda bonorum illarum [regio]num possessione, et quod familiäres domini episcopi affirmant satis, quod ipse episcopus magis velit sustinere cohertionem quamcumque [pro] monasterio Augiensi sibi infligendam, quam ab ipsius detentione desistere. Nos vero, cum satis boni consilii copiam habeamus, [. .] videlicet scolasticum⁹ et alios iurisperitos Argent(inenses) reditum tamen ipsius episcopi prestolamur, facturi quicquid nobis ad accelera[tionem] ipsius negotii incubuerit faciendum. Vos tamen in curia manete et incontinenti remittite nobis unum de [nuntiis] istis, per quem nos scire faciatis omnem vestram voluntatem, si videlicet vos revocare debeamus vel aliquid aliud fa[cere] vel mittere, quod vobis seu nobis duxeritis oportunum. § Obtinete alium executorem subrogari, prepositum videlicet Ar[gentinensem]¹⁰, quia timendum est, quod excipiatur excommunicatio contra dominum de Sulze¹¹, qui a iudicibus Magunt(inensibus)¹² ad instantiam prepositi et conven[tus O]mnium Sanctorum¹³, Argent(inensis) diocesis, citatus, petens sibi locum tutum assignari, non fuit exauditus, et licet super illo gravamine ap[pellav]erit, processum tamen extitit contra ipsum ad excommunicationem pro contumacia, et credit super illa appellatione literas impetratas iam esse [a .. .]aldino¹⁴, quas vos requiratis, et si sint impetrate, transmittatis, sin autem, vos ad decanum sancti Galli¹⁵ impetretis [sine] mora super appellatione eadem. Item ad eundem prepositum, quod si dominus episcopus Constantiensis infra certum terminum non^b) absol[verit] monachos, milites et alios a iuramento sibi prestito ipse prepositus nichilominus absolvat eosdem. Item ad eundem, ut [cog]at quoslibet ad solutionem censuum et aliorum reddituum de bonis monasterii Augiensis solvendorum. Habete recommendatum [negotium avunculi nostri C. de Wartinberc¹⁶ super absolvendis fideiussoribus suis, prout ipsemet per literas suas vobis [man]dat, et negotium comitis Eber. de Vering(en)^a)17. Item ad instantiam comitis Wolfradi senioris de Vering(en)^a)18 rogamus, ut [cum or]dinarius ex certa causa sibi sit suspectus, aliquem sibi iudicem obtinere velitis, coram quo conveniat et conveniatur. Item sciatis, [quod li]teras illas, quas semel et secundo misistis, recepimus et, sicut mandastis in eis, laboramus satis pro attrahendis nobis monachis, [sper]amus eos ad voluntatem nostram cito esse debere. De aliis omnibus, que scripsistis, cauti erimus, in quantum possumus. Et si status [nego]tii aliqualiter fuerit immutatus apud nos, hoc vos incontinenti scire faciemus. Vos etiam unum de istis nuntiis inconti[nent]i remittite et statum vestrum nobis remandate. Habeatis omnia, sicut de vobis confidimus, commendata. Nostri esse nolumus [... .]o ipso, sed vestri, et ideo^c) quicquid vobis expedire videatur, facite et nos facere demandate. Una etiam causa tardationis istorum [nunt]iorum fuit, quod aurum non potuimus invenire^d).

Source Fulltext: Chartularium Sangallense III, Nr. 1589, S. 425-427.