In nomine domini amen. Nos praepositus monasterii sancti Galli¹ iudex a venerabili viro thesaurario ecclesiae Curiensis² iudice a sede apostolica delegato subdelegatus notum facimus universis, quod B. dictus Homo³ contra H. dictum Rugge clericum, H. et B. dictos Luovun litteras a sede apostolica ad discretum virum thesaurarium ecclesiae Curiensis inpetravit super eo, quod praedicti clerici H. et B. dicti Luouun super perpetua capellania altaris sancti Petri in ecclesia de Wil⁴ et rebus aliis iniuriarentur eidem. Cum igitur huius auctoritate mandati prsedictus thesaurarius dictos clericos H. et B. contra se ad faciendam iustitiam pluries evocasset et ipsi singulis citacionibus conparere minime curavissent, memoratus thesaurarius nobis causam commisit canonice decidendam. Quapropter in ipsorum contumaciam, facta tamen citacione legitima, pro singulis articulis expediendis ad receptionem testium decrevimus procedendum. Receptis itaque testibus et eorum dictis publicatis et diligenter examinato negotio iuris ordine observato factaque citacione canonica ad diffinitivam sententiam audiendam, quia dicti clerici H. et B. solita pertinacia contumaces exstiterunt, de proborum et sapientium consilio ipsorum absentia divina replente sentencia diffinitive pronunciamus decernendo, dictam capellaniam ad memoratum B. dictum Homun pertinere debere et eum ius habere in eadem, et ipsam eidem B. adiudicamus et memoratis H. dicto Rugge, H. et B. dictis Luovin silentium perpetuum inponimus et duximus inponendum. In cuius rei testimonium prsesentes litteras sigillo nostro dedimus roboratas. Datum apud sanctum Gallum, anno domini millesimo ducentesimo octogesimo quinto, indictione decima tertia, tertio non. septembris.

Source Fulltext: Chartularium Sangallense IV, Nr. 2146, S. 292.