In gottis namen amen. Wir graue Ludewig von Homberg¹ vnde herre ze Rapprehzwile² kunden allen, die disen brief an sehent oder ho^erent lesen, daz || wir dur vnser nôt vnde lihterunge vnsers geltis den hof ze Gelterchingen³, der vnser vnde Hermans vnde Itun siner swester grauen Frideriches seligen vnsers || brůder kinde⁴ reht lidig eigen waz, mit der vorgenandan Hermans vnde Itun gůten willen, verhengunge vnde gůtem gunste geben haben vnde verko^vffet vmbe || vierzeg march silbers zweier minre Burkarte imme Steine vnde Růdolf Rihtelin bvrgern von Rinuelden⁵ ze besizzenne, ze niezzenne vnde ze habenne vur lidig eigen vnde mit allem rehte vnde nuzze, so wir in hatten vnde besazen, an eine die lute, die drin horent, die haben wir inen niht versezzet noh geben noch uerko^vfet. Vnde enzihen vns o^vch alles rehtes, vorderunge vnde ansprache, die wir graue Lud. vnde fro Elizabeth vnser vrowe⁶ vnde wirtin, mit der willen vnde verhengunge o^vch diz geschach, vnde vnser kint an gerihte geislichem vnde weltlichem alder ane gerihte gegen den vorgenanden bvrgern von Rinuelden mo^ehtin han alder gewinnen. Ich der vorgenande graue Herman vnde ich Ite sin swester veriehent disen vorgenanden ko^vf geschehen sin mit vnserm guten willen vnde verzihent vns o^vch vnde haben uerzigen an der vorgenanden Burkartis vnde Růd. hant alles rehtis vnde ansprach, so wir an den vorgenanden hof haten vnde haben soltin. Har vber zeime vrkunde vnde zeiner sicherheit geben wir der vorgenande graue Lud. disen brief besigelt mit vnserm ingesigel. Ich aber graue Herman der vorgenande vnde ich Ita sin swester, wan wir niht ingesigels habint, so habin wir an disen brief o^vch zeime vrkunde vnde ze bezugenge des rates vnde der bvrger von Rapprehzwil ingesigel gehenket. Diz geschach in dem jar, do von gottis geburte waren zwelfhundert vnde aht vnde ahzeg jar, vf der burg ze Rapprehzwile an sante Agetun tag. Da waren ze gegen her Růdolf von Werdegge⁷, her Matiz von Eptingen, her Peter von Eptingen rittere, Heinrich von Eptingen hern Matiz sun⁸, Heinrich von Ifendal⁹, Go^etfrit von Bůbendorf¹⁰, Cůnrat der vogt von Homberc¹¹, . . Holza der schultheiz von Liestal¹², Jacob der schultheiz von Rapprehzwil¹³, Heinrich der Marschalch, Cůnrat der Truhsezze¹⁴ burgere von Rapprehzwile.||
Wir der rat von Rapprehzwil vnde die burgere dur die bette dez vorgenanden grauen Hermans von Homberc vnde vron Itun siner swester habent disen brief besigelt mit vnserm ingesigele.

Source Fulltext: Chartularium Sangallense IV, Nr. 2188, S. 321-322.