Allen den, die disen brief an sehent oder ho^erent lesen, kunden wir . . der rat von Zurich, der namen hie || nach geschriben sint, das vro Berchte Tumbschina, Wetzels des Hullers vnsers burgers wirtin, ir eigen || hus, das da lit ze Zurich an vron Swendinun gassen¹ zwischen Eppelis huse von Gisingen² vnd dem kel||re der Sutrinun vnder den Tilinon³, ledekliche vf gab mit allem rechte dem gotzhuse der abteie von Zurich⁴ vnd vůgete, das es den erberen luten den swestern vnd dem gotzhuse von Wurmspach⁵ dannan verlihen wart ze rechtem erbe vmb einen ierglichen zins eines pfenninges, vnd do sis besessen hatten dri tage vnd sechs woche růwekliche, do lech es du erbere vrowe du ebtissin von Wurmsbach an ir vnd an ir gotzhuses stat den vorgenanden vron Berehtun Tumbschinun vnd ir wirte Wetzeln, die wile si lebtin, vmb einen ierglichen zins eines pfenninges, den man inen geben sol ze des heilgen chruzes tult ze herbeste, vnd swenne si verderbent, so hant ir erben an dem huse nit ze schaffenne, wan das es dem gotzhuse von Wurmspach ledig ist alles dinges, vnd swas hie vor geschriben ist, das ist beschehen mit, dem gůtem willen vnd mit der hant Wetzeln des vorgenanden. Vnd das dis war si vnd stete belibe, so henken wir vnserre burger ingesigele an disen brief zeinem offennen vrkunde, ze Zurich, do von gottes geburt waren zwelfhundert vnd nunzig iar vnd dar nach in dem vierden iare, mornandes nach sant Michels tage. Vnser des rates namen sint: her Ru^edeger Manesse der elter, her Willehein von Chloton⁶, her V^olrich von Scho^enenwert⁷, her Růdolf von Lunkunft⁸ rittere, her Heinr. der alte Bilgrin, her Chůnrat vnd her Niclaus die Chriege, her Růdolf von Opfinkon⁹, her Johannes Brechter, her Hug Manesse der iunger, her Willeheln Gorkeit, her Johannes Biberli burger ze Zurich.

Source Fulltext: Chartularium Sangallense IV, Nr. 2359, S. 445-446.