Universis sancte matris ecclesie filiis, ad quos presentes littere pervenerint, nos miseracione divina Bertrandus Assisiensis¹, Franciscus Acciensis², Jacobus Henrensis³, Anancius Xanchiensis⁴, Nitardus Termopolensis⁵, Franciscus Vrehensis⁶, Petrus Calliensis⁷, Johannes Tertopolensis^a)8, Matheus Langonensis⁹, Gregorius Opidensis¹⁰, Johs. Tribuniensis¹¹, Augustinus Testillariensis¹², Adam Perpenensis¹³, Gregorius Salunensis¹⁴ et Johannes Draconarianus¹⁵ episcopi salutem in domino sempiternam. Splendor paterni luminis, qui sua mundum ineffabili illuminat claritate, pia vota fidelium de sua clementissima maiestate sperancium tunc precipue benigno favore prosequitur, cum devota ipsorum humilitas sanctorum meritis et precibus adiuvatur. Cupientes igitur, ut ecclesia parrochialis sancti Laurencii in opido sancti Galli¹⁶ Constanciensis dyocesis congruis honoribus frequentetur et a Christi fidelibus iugiter veneretur, omnibus vere penitentibus et confessis, qui ad dictam ecclesiam in singulis sui patroni festivitatibus et in omnibus aliis infrascriptis videlicet natalis domini, circumcisionis, epyphanie, parasceves, pasche, ascensionis, penthecostes, trinitatis, corporis Christi, invencionis et exaltacionis sancte crucis, in singulis festivitatibus beate virginis, sancti Michahelis archangeli, nativitatis et decollacionis sancti Johannis Baptiste, beatorum Petri et Pauli apostolorum et omnium aliorum apostolorum et evangelistarum ac quatuor ecclesie doctorum, in festo omnium sanctorum, in commemoracione animarum et in dicte ecclesie dedicacione sanctorumque Sthephani, Georgii, Blasii, Martini et Nicolai, sanctarum Marie Magd(alene), Katherine, Agathe, Margarethe et per octavas omnium festivitatum predictarum octavas habencium singulisque diebus dominicis et sabbatinis tocius anni causa devocionis oracionis aut peregrinacionis accesserint seu qui missis, predicacionibus, matutinis, vesperis, exequiis et sepulturis mortuorum aut aliis divinis officiis ibidem interfuerint aut qui cimiterium dicte ecclesie pie deum exorantes circuiverint aut qui corpus Christi vel oleum sacrum, cum infirmis portentur, secuti fuerint aut qui in serotina pulsacione campane genibus flexis ter Ave Maria dixerint, hecnon qui ad fabricam luminaria vel ornamenta dicte ecclesie manus porrexerint adiutrices aut qui dicte ecclesie in testamentis vel extra aurum argentum vestimenta libros calices aut quevis alia sibi necessaria donaverint legaverint seu donari vel legari procuraverint et qui pro impetratore presencium fundatoribus ac benefactoribus ecclesie sepedicte vivis et defunctis preces deo porrexerint, quocienscumque quandocumque et ubicumque premissa vel aliquid premissorum devote fecerint, de omnipotentis dei misericordia et beatorum Petri et Pauli apostolorum eius auctoritate confisi singuli nostrum quadraginta dies indulgenciarum de iniunctis eis penitenciis misericorditer in domino relaxamus, dummodo dyocesani voluntas ad id accesserit et consensus. In cuius rei testimonium sigilla nostra presentibus sunt appensa. Datum Auione^b), III. die mensis iulii, anno domini millesimo tricentesimo quinquagesimo et pontificatus domini Clementis pape VI. anno IX^o.

Source Fulltext: Chartularium Sangallense VII, Nr. 4180, S. 99-100.