URBANUS episcopus servus servorum dei. Dilectis filiis Zacharie Abbati et Conventui Monasterii Lucensis Premonstratensis ordinis Olomucensis diocesis, Salutem et apostolicam benedictionem. Exposcit vestre devotionis sinceritas et religionis promeretur honestas ut tam vos quos speciali dilectione prosequimur quam Monasterium vestrum dignis honoribus attollamus. Hinc est quod nos vestris in hac parte supplicationibus inclinati ut tu fili Zacharia et successores tui Abbates dicti Monasterii qui pro tempore fuerint Mitra anulo et aliis Pontificalibus insignis libere possitis uti necnon quod in dicto Monasterio et Prioratibus eidem monasterio subiectis ac parrochialibus et aliis ecclesiis ad vos communiter vel divisim perti-nentibus quamvis vobis pleno iure non subsint benedictionem solennem post missarum vesperorum et matutinarum solemnia dummodo in benedictione huiusmodi aliquis Antistes vel apostolice sedis legatus presens non fuerit elargiri possitis felicis recordationis Alexandri pape IIII predecessoris nostri que incipit Abbates, et aliis quibuscunque constitutionibus apostolicis in contrarium editis nequaquam obstantibus vobis et eisdem successoribus auctoritate apostolica de speciali gratia tenore presentium indulgemus. Nulli ergo omnino hominum liceat hanc paginam nostre concessionis infringere vel ei ausu temerario contraire. Siquis autem hoc attemptare presumpserit indignationem omnipotentis dei et beatorum Petri et Pauli Apostolorum eius se noverit incursurum. Datum Janue III Idus Novembris Pontificatus nostri Anno Nono. Relicta gratis (Scriptor): T(heodricus) Fabri

Source Fulltext: Peter Peusquens, Karlsruhe