|N001|Wir Ruprecht von Gots gnaden phalczgrave zu Reyn und herczog zu Beyern erkennen uns |N002|uffenbar an dysem briefe umbe den aulaz, als unsir liebir gnediger herre her Karl, Romischer |N003|kunig, zu allen zeiten merer des reichs und kunig zu Behemen , uff eyn seyt und unsir liebir |N004|vettir Ludewig, phalczgrave zu Reyn, marggrave zu Brandenburg und herczog zu Beyern uff |N005|die andir seyt, allir irre sache, zweyunge und missehellunge an uns gelaszen haben, so scheiden |N006|und sprechen wir umbe die stat zu Werde, daz unsir vorgenanter herre her KarI, Romischir kunig, |N007|unserm egenanten vettern, marggraven Ludiwigen und seynen brudern, die zu yme geteilt sint, |N008|die selben stat zu Werde in yr gewalt schaffin und antwortin sol in allir der masze und wiis, |N009|als ir anherre und ir vattire, die selben stat vormals inne gehabit hant und uff sie geerbit |N010|hant, auch sol unsir vorgenanter herre der kunig schaffin mit den burgern zu Werde, daz |N011|sie unserm vorgenanten vettern, marggraven Ludiwig und sin brudern, die zu ym geteilt sint, huldin, |N012|swern und vorbaz gehorsam seyn in allir der masze und wiis, als sie vormals yrm anherren |N013|und yrm vattir vorbunden waren. Dez zu urkund und zu eyner waren geczugnisze, |N014|so geben wir unserm vorgenanten herren hern Karl, Romischem kunige, zu allen zeyten merer des |N015|reychs und kunige zu Behemen , dysen brieff vorsigelt mit unsirm anhangend ingesigil, |N016|der geben ist zu Nurenberg, do man zalte noch Cristi geburt druczehen hunder jare, |N017|dar noch in dem funfezigestem jare an dem samsztag vor Jubilate .