Sigismundus, Dei gracia rex Hungarie, Dalmacie, Croacie etc. marchioque Brandenburgensis, sacri Romani imperii vicarius generalis, fidelibus suis, capitulo ecclesie Posoniensis, salutem et graciam. Dicitur nobis in persona conventus monasterii Sancti Martini Sacri Montis Pannonie, quomodo Ranpether iudex et Cristan filius Iacobi, Georgius Possalkmesth ac Petrus institor, necnon provide domine Herlimhosuar et Nicolai dicti Berzethe relicte, cives et hospites civitatis nostre Posoniensis his proxime elapsis disturbiorum regni nostri temporibus terciam partem tributorum seu teloniorum racione et pretextu navigii super portibus Danubii iuxta castrum nostrum Posoniense habitis, videlicet Challorev et Berekenye vocatis, exigi consuetorum, ipsique conventui de iure spectantem pro se ipsis minus iuste et indebite usurpando occupassent et occupatam de presenti conservarent, magnos fructus et proventus hactenus de eisdem percipiendo in preiudicium iuris et dampnum prescripti conventus valde urgens. Super quo fidelitati vestre firmiter precipiendo mandamus, quatenus vestrum mittatis hominem pro testimonio fide dignum, quo presente Petrus dictus Ponya de Bar aut Iohannes literatus, filius eiusdem vel Iohannes de Mothaza, aliis absentibus homo noster ad prefatos iudicem ac cives et hospites dicte civitatis nostre Posoniensis accedendo dicat eisdem et committat verbo nostre maiestatis, ut ipsi prescriptam terciam partem tributorum prescripti navigii portibus in prescriptis exigi solutorum remittere et resignare de premissoque fructu et proventu ipsius navigii per ipsos, ut predicitur, actenus (!) recepto et usurpato pleno cum effectu pretitulato conventui correspondere et satisfacere debeant et teneantur. Qui si fecerint, bene quidem, alioquin evocet eosdem iudicem ac cives et hospites nostros contra pretactum conventum Sancti Martini nostram specialem in presenciam ad terminum competentem racionem de premissis reddituros efficacem, litis pendentia, si qua fuerit inter ipsos, non obstante. Et post hoc ipsarum ammonicionis et evocacionis seriem cum nominibus evocatorum terminoque assignato eidem nostre speciali fideliter rescribatis maiestati. Presentes autem propter absentiam venerabilis patris domini Eberhardi episcopi ecclesie Zagrabiensis, aule nostre cancellarii et sigillorum nostrorum erga ipsum habitorum sigillo eiusdem fecimus consignari. Datum Bude feria sexta proxima post festum Beati Dionysii martiris, anno Domini MCCCCX. [1410. okt. 10.]||
[Hátán:] Fidelibus suis capitulo ecclesie Posoniensis pro conventu monasterii Sancti Martini Sacri Montis Pannonie nostram specialem in presentiam.