Uniuersis christi fidelibus presentes litteras inspecturis. Nos dei gracia Adenulphus Consanus, frater Ranutius Calaritanus et frater Basilius Armenorum in Jerusalem archiepiscopi, Bonifacius Parensis, Nicolaus Necastrensis, Thomas Etesiensis, frater Jacobus Chalcedonensis, Bernhardus Pacensis, frater Anthonius Chenodiensis, Manfredus sancti Marchi (!) et frater Nicolaus Tortibulensis salutem in domino sempiternam. Splendor paterne glorie, qui sua mundum illuminat ineffabili claritate pia uota fidelium de elementissima ipsius maiestate sperancium tunc precipue benigno fauore prosequitur, cum deuota ipsorum humilitas sanctorum precibus et meritis adiuuatur. Cupientes igitur ut ecclesia beati Nicolai confessoris in Gerboltschirchen Patauiensis diocesis congruis honoribus frequentetur et a Christi fidelibus iugiter ueneretur omnibus uere penitentibus et confessis, qui ad ipsam ecclesiam in festiuitate ipsius beati Nicolai, in dedicacione eiusdem ecclesie, in festiuitatibus Natiuitatis domini nostri Jesu Christi, Resurrectionis, Ascensionis, Pentecostes, in omnibus et singulis festiuitatibus beate Marie semper virginis, in festiuitatibus beatorum Michaelis archangeli, Johannis Baptiste, omnium apostolorum, Stephani et Laurentij martirum, Martini coufessoris nec non beatarum Margarete et. Katherine virginum ac per octo dies festiuitates predictas immediate sequentes causa deuotionis et orationis accesserint annuatim, vel qui ad reparamenta, luminaria et ornamenta dicte ecclesie manus porrexerint adiutrices seu qui corpus Christi, quando infirmis portari contigerit pia mente fuerint comitati, de omnipotentis dei misericordia et beatorum Petri et Pauli apostolorum eius auctoritate confisi singuli singulas dierum Quadragenas de iniunctis eis penitentijs misericorditer in domino relaxamus. Dummodo diocesani uoluntas ad id accesserit et consensus. In cuius rei testimonium presentes litteras sigillorum nostrorum iussimus appensione muniri. Datum Rome die XVIII. mensis Nouembris sub anno domini tricentesimo pontificatus domini Bonifacii pape Octaui anno sexto.

Source Fulltext: OÖUB 6 (Wien 1972), S. 597f., Nr. 29 (Anhang)