[21. April 1416]

[1] Die 21^a mensis Aprilis facta est congregatio facultatis ad deliberandum super quibusdam facultati necessariis.

Et fuit conclusum, quod deberet adire decanus dominum rectorem universitatis et eum petere, ut faceret congregationem universitatis pro locatione doctorum medicine et licentiatorum facultatis theologie et iuris canonici; quod si recusaret rector, tunc decanus deberet requirere eum per iuramentum et si iterum nollet, tunc decanus deberet facere congregationem facultatis ad ulterius deliberandum, quit [!] expediret. [2] Secundo fuit conclusum, quod licentiati medicine facultati incorporati deberent amoneri per iuramentum ad interessendum singulis disputationibus doctorum, sed licentiato Sebaldo deberet dici, quod se a practica subtraheret aut incorporaret se facultati; quod si obedire nollet, tunc facultas contra eum vellet procedere secundum quod sibi videretur.

[3] Tertio fuit conclusum, quod una cedula, in qua essent articuli contra appotecarios conscripti, deberet presentari domino canncellario [!] principis et consequenter deberet ad ipsius consilium agi.

[4] Quarto dispensatum fuit cum noviter doctorato magistro Iohanne Kro de Kothebus, quod posset se absentare a Wienna, ita tamen quod si umquam rediret, legeret secundum tenorem statuti facultatis nostre. Motum fuit de practicantibus non admissis, sed tunc nihil conclusum.