[21. Februar 1454] Item feria quinta ante festum sancti Mathie congregata fuit facultas ad audiendum articulos conceptos per deputatos super responsione apotecariorum et fuit primus, quod doctores de prima responsione essent bene contenti; de secundo articulo est intencio doctorum, quod ipsi tales empericos nec volunt fovere nec in practica dirigere nec eos ad gradum promovere; de tercio est doctorum intencio, etsi talis practica eciam quandoque facta est, illud pro presenti domini doctores remittunt; nisi quod in futurum non fiat, sed expediant apotecarii facta sua conficiendo et dispensando medicinas suas in apoteca et non mittant manus in messem alienam, scilicet incaute dando consilia et specialiter medicinam laxativam aut alias periculosam, ut opium, vel arsenicum non dent alicui preter disposicionem aprobati medici; de quarto, scilicet de dispensione equali, est dominorum doctorum intencio et placeret, quod, ex quo precedenter apotecarii fecerunt ordinacionem et registrum conscriptum secundum ordinem alphabeti omnium suarum, scilicet medicinarum compositarum, et descripcionem earum, quas communiter pro apoteca dispen [fol. 30r]364 sant et conficiunt, quod tale registrum dominis doctoribus medicine facultatis presentarent et si vellent eciam addere alias receptas extraordinarias, quas eciam communiter conficiunt, in hoc facultatis medicine voluntatem perficerent, et si appareret facultati aliquid addendum vel removendum, illud vellet addere vel removere et apotecariis illud significare, et quidquid ex utraque appareret utile et pro bono communi tenendum, quod illud postea teneretur ab omnibus concorditer; de quinto, scilicet licita vendicione medicinarum, facultas remittit illud conscienciis apotecariorum, ita tamen, quod homines non graventur iniuste et quod ex inequali eorum computacione dominis doctoribus et sibi ipsis scandalum vel diffamia non oriatur.

Et addidit ultimo facultas medicine supplicando apotecariis, quod ita bene facerent et medicinas simplices bonas et recentes ad suas medicinas compositas reciperent et eas ad honorem Dei et utilitatem proximi debite et fideliter dispensarent et conficerent.365 Et placuit tunc facultati, quod articuli sic concepti deberent per pedellum mitti apotecariis. Fuit autem tunc motum per plures doctores, ex quo Vincencius apotecarius habuisset convivium pro tota facultate et pro omnibus apotecariis, quod eciam pro meliori concordia ac amicicia deceret facultatem medicine habere convivium pro omnibus apotecariis, et quamquam non fuerit de hoc articulus motus, tamen placuit doctoribus, quod decanus de hoc vota colligeret, et sic fuit concordia omnium doctorum pro tali convivio habendo. Sed de expensis pro huiusmodi fuit pluralitas votorum, quod partim reciperentur de archa facultatis et partim de contribucione doctorum, et sic fuit conclusum, quod fieret convivium cum domino doctore Mag. Iohanne Celler proxima die dominica, que eciam erat festum sancti Mathie366, ad quod fuerunt omnes apotecarii invitati et simul articuli predicti fuerunt eis per pedellum presentati. Sed de quantitate contribucionis doctorum ad huiusmodi convivium nichil fuit protunc conclusum. 367