[28. Februar 1454] Ultima die Februarii fuit facultas congregata super hiis duobus articulis, quorum primus fuit ad audiendum responsionem apotecariorum. Secundus articulus fuit ad recipiendum computum ex parte convivii habiti et ad concordandum de exsolucione eiusdem. Pro primo articulo venerunt omnes apotecarii ad congregacionem facultatis medicine et presentaverunt facultati registrum conscriptum secundum ordinem alphabeti ad duos sexternos, continens receptas omnium medicinarum compositarum, quas communiter pro apoteca dispensant et conficiunt, eciam responsionem super articulis eis proxime transmissis. Et ultra hec proposuerunt ore quosdam articulos gravamina eis per doctores veniencia exprimentes, supplicantes, ut talia eis non eveniant. Et placuit tunc facultati, ut eciam eosdem articulos scriptos facultati presentarent et tunc, facta deliberacione et visis diligenter et attente receptis, vellet eis respondere. [fol. 30v]368

Sed de secundo articulo, facta computacione, summa exposita pro convivio cum apotecariis facto fuit 4 libr. den. et 10 den.369, et apparuit protunc decano, quod non conveniret aliquid recipere de archa facultatis ex parte illius convivii, quia ipse non legit simile esse decenter factum in actis facultatis medicine, et ne esset occasio sequentibus, ut sine necessitate de pecunia facultatis convivia facerent, propter hec et alia predixit doctoribus protunc presentibus, quod stantibus motivis eum tunc moventibus non valeret concludere bona consciencia, quod aliquid reciperetur de archa facultatis medicine ex parte predicti convivii370. Et quia facultas non fuit plene congregata, quia defecerunt duo doctores, ideo secundus articulus, quoad secundam eius partem, fuit protunc suspensus usque ad pleniorem facultatis congregacionem.371

Item fuit eciam motum in pluribus congregacionibus de domino Matheo, hospite domus nostre, qui petivit sibi locari domum facultatis medicine ad plures annos, scilicet quatuor, et relaxacionem in censu, quia vellet illud bene recuperare in reformandis, et fuit tunc conclusum, quod locaretur sibi domus facultatis ad tres annos cum condicionibus in precedenti convencione et pro eodem censu, sed reformanda posset et deberet reformare sub expensis facultatis cum consensu decani, ista tamen speciali condicione addita, quod si aliquis ex doctoribus medicine facultatis vellet eandem domum inhabitare et illud significaretur sibi ante medium annum alicuius anni predicti, quod ipse sine contradiccione eidem doctori cederet post complementum eiusdem anni, in quo sibi significatum est. Et ista intencione decanus protunc predicto domino Matheo eandem domum facultatis locavit in mense Marcii 1454.

[März 1454] Item prenominatus dominus Matheus exposuit pro reformandis domus facultatis 3 libr. den. 74 den., quas michi computavit et defalcavit in censu et dedit ad hoc 2 libr. den. 5 sol. 16 den., quod totaliter facit 6 libr. den.