[2. Mai 1454] Consequenter 2. die Maii facta est congregacio super articulo formato ex parte empericorum. Et conclusum erat tunc, quod nullus doctorum ad curam reciperet ex post aliquem, qui foveret empericos aut in contemptum doctorum aliquem ex eis assumet.

Item eciam tunc vocati erant appotecarii et avisati, ut nullus ex eis attemptaret dispensare receptas empericorum et eciam ut taxam formarent receptarum, et ultimo responderunt, si talis taxa non deberet eis ferri in preiudicium, ipsi contenti essent eam formare, et nunquam illud ad effectum produxerunt.

Item ex tunc eciam conclusum erat, quod decanus cum seniore accederent Magistrum civium et declararent ei causas, quare taxam receptarum ab eis requirerent. Quo facto respondit Magister civium, quod facta nostra in scriptis ad consilium porrigere deberemus et postea vellent nobis asistere in petitis, quantum possibile essent etc.

Postea iterum inventi sunt appotecarii receptas empericorum dispensantes, et conclusum erat, quod nullus doctorum in mense scriberet ad appotecam, in qua recepta emperici dispensaretur.

Postea in convivio Mag. Sebaldi conclusum erat per facultatem, quod quamvis doctor alterius universitatis disputasset, non tamen deberet recipi ad consorcium doctorum, nisi solveret peccuniam pro facultate.

Item tunc eciam conclusum erat, quod Mag.374 Ieorius de Amberga et Mag. Liehardus Schwalb peccuniam pro facultate infra octo dies solverent aut pignus decano presentarent. Non exsecuta sunt.

Item conclusum erat iterum de Mag. Liebhardo Schwalb, si amonitus peccuniam facultati non solveret, ex post emolumentis facultatis non utatur, quousque solveret. [fol. 31v]375