[6. Februar 1456] Item 3 den.pro media vini famulo, qui portavit citaciones ad locum. Item 10 den. pro sera ad antiquam cistam et magnam in die sancte Dorothee.

Item exposui in una congregacione facultatis 22 den. pro vino, piris et semella et 32 den. pro malvasia. Item pro clavibus ad liberiam decano pertinentibus 18 den.

Item in alia congregacione facultatis exposui pro duabus octavis malvasie 64 den. et pro lebetis et semellis in hac et aliis congregacionibus 7 den.

Item exposui pro pedello iterum 12 sol. den. pro suo sallario sibi deputato.

Item exposui 20 den. de pecunia facultatis Mag. Martino Guldein, quos Mag. Marquardus debebat sibi dare et ad tollendum discordias hoc feci et pro eo cambini unum de florenis perceptis pro 7 sol. 23 den.

Item pro creta 1 den., pro papiro et aliis volo vobis propinare. [fol. 38r]

Item anno eodem fuit articulus formatus de domo locanda pro futuro anno, et conclusum fuit super eodem ad commissionem Mag. Caspar et Mag. Iohannis Kirchaim, quam Mag. Marquardus fecit eisdem, qui tunc domum inhabitabat, quod esset sibi locanda pro anno futuro pro 11 libris, quemadmodum tunc facultas sibi pro anno precedenti locavit, et pro caucione sufficienti prefati domini doctores Mag. Iohannes Kirchaim et Mag. Caspar posuerunt se fidejussores pro censu anni presentis adhuc debiti, qui erat 6 libr. den., et pro censu anni sequentis ac libris aput eum repositis, quorum unus est per eum acomodatus et est Cirurgia Lanfranci, alius est aput eum repositus per dominum doctorem Mag. Casparum racione officii, quia tunc decanus fuit; quos quidem libros ipse debebat mihi presentare, sed quid eum impediverit, ipse scit.

Item eodem die fuit secundus articulus ex parte empericorum, qui suis probris solent nos conviciare, et ad eos compescendos fuerunt deputati ad hoc Mag. Martinus Guldein et Mag. Iohannes Kirchaim, qui deberent facere suam diligenciam aput dominum rectorem nostre floride universitatis et aput Magistrum civium opidi Wyennensis, ut eis silencium inponeretur et practica inhiberetur.