[3. Februar 1463] Item die 3. mensis Februarii congregata fuit facultas sub pena non contradicendi553 ad recipiendum debita a debitoribus facultatis. Et primo decanus presentavit 6 flor. Hungaricales, quos recepit in die sancti Colomanni de antiquo decano, et septimum, quem recepit a Mag. Stephano Kulant de Rein precedenti die; post hoc dominus doctor Mag. Martinus Guldein presentavit 5 flor. Hungaricales, quos tenebatur facultati, et protunc eciam movit ibi, quomodo haberet 11 libros medicinales, qui olim fuissent pie memorie Mag. Nicolai de Heberstorff, doctoris eximii, et desideravit, quot [sic!] isti libri reponerentur ad librariam per modum testament[i], et ultra hoc eciam desideravit, quod pro futuro omni anno celebraretur una missa pro salute anime prefati Magistri in festo sanctorum Cosme et Damiani martirum sub officio publico in altari sancte Crucis ecclesie sancti Stephani, et tunc facultas dixit sibi, quod in proxima congregacione deberet presentare predictos libros et tunc facultas vellet eos conspicere et post hoc eciam554 super illud deliberare melius; quod et. factum fuit in proxima congregacione post hoc.

Item eodem die et in eadem congregacione, facto computo per Mag. Conradum Prawn de Muldarf, defalcatis singulis defalcandis, exsolvit facultatem ad plenum de perceptis preteritis et eciam in censu preterito usque ad festum sancti Colomanni martiris, quod fuit anno 1462, et dedit certos florenos Hungaricales et certos Renenses, in quibus tunc facultas tenebatur sibi 18 den., quos tunc decanus concessit facultati et dedit sibi.555

Item eodem die fuit sibi domus locata pro anno futuro pro 10 flor. Hungaricalibus et cum ista condicione, quod facultas post hoc semper esset libera556 ad locandum domum, cui557 placeret et qualiter placeret. Item Mag. Iohannes de Kirchaim, dominus doctor, dixit, quod vellet facultatem statim exsolvere vel ad maximum in sequenti die proxima, quod utique in decanatu meo non fecit, licet pluries per me et eciam per pedellum postulaverim nomine facultatis ab eo558, et summa fuit 2 libr. et 3 sol. den., et isti floreni omnes, scilicet Hungaricales et Renenses prius expressi [fol. 54v] fuerunt positi ad archulam parvam ad alios florenos ibi existentes, quorum fuerant 31, et fuerunt omnes reclusi. Item eciam exposui protunc pro colacione 26 den. per pedellum.