[1. Oktober 1490] Item 1. die mensis Octobris congregata fuit facultas ad audiendum peticionem cuiusdam doctoris alterius universitatis petentis se admitti ad repetendum unum canonem etc. juxta statuta facultatis. Et nomen ipsius fuit Mag. Bartholomeus Stäber de Wienna. Cuius peticio fuit exaudita, et assignatus fuit sibi per facultatem canon iste in secundo Tegni Galleni: ,Calidioris igitur ut ad proprium modum referamus cordis signa inseparabilia quidem et familiaria hec sunt: magnitudo respiracionis et pulsus etc.', et sibi pro respondente deputatus fuit Mag. Michael Eysälaer ex Praunaw, arcium magister et in medicina baccalarius, et fuit sibi admissum, quod posset repetere post vacancias protunc existentes, quantocius sibi placeret. Fuit eciam tunc conclusum, quod antequam ad facultatem assumeretur, debeat dare facultati 4 flor. Ungaricales et bedello 1 flor. Ungaricalem cum dimidio.