[7. Juli 1443] Item 7.178 die mensis Iulii179 facta est congregacio facultatis medicine in domo decani ad expediendum articulos subscriptos: Primus ad audiendum supplicacionem cuiusdam doctoris medicine alterios universitatis volentis petere, ut ad actus previos ad incorporandum facultati requisitos juxta eiusdem facultatis statuta admittatur.180 Et doctor iste fuit Mag. Michael Gresel, qui attulit testimonium literale promocionis sue et sonuit, quod idem Mag. Michael sit promotus in Feraria. Et facultas medicine, audita sua supplicacione et viso ac audito suo testimonio, conclusit, quod ipse pro ista vice non deberet admitti et consequenter conclusit, quod doctores facultatis deberent habere diligentem inquisicionem ex parte universitatis, in qua promotus est, videlicet an ipsa sit privilegiata taliter, quod promoti in ea sint merito acceptandi in consortium doctorum facultatis medicine hic in studio Wiennensi, cum in eadem universitate non continuentur lectiones, quemadmodum est solitum fieri in studio Wiennensi.

Secundus articulus ad recipiendum computum a decano precedenti; qui receptus est et defalcatis defalcandis decanus precedens obligabatur in 8 libr. den., 3 flor. et 3 sol.; Magister vero Iohannes Zeller obligabatur in 8 flor., 5 sol. et 18 den., quos presentavit michi; Magister vero Petrus Volzian presentavit michi 12 flor. et 30 den.; ego vero ex antiquo obligor 12 sol. et 8 den. et sic summa summarum extendit se ad 20 flor., 2 libr. et 86 den., quam summam percepi dominica proxima ante Margarete. Item percepi 3 libr. cum media a Mag. Michaele Gresel et 2 flor. a Mag. Martine. Item exposui mediam libram pro festo sanctorum Cosme et Damiani.