[21. März 1492] Item in die sancti Benedicti Chunradus nomine de64 suspendio65traditus est, pro quo tunc facultas, ut prius premissum est, anathomie causa laboravit et obtinuit. Qui cum ad domum facultatis deductus, cum maximo dominorum doctorum labore revivixit; erat enim in eo adhuc spiritus, sed morti valde propinquus. Fuit fleobothomia in ambobus cephalicis et quidem larga celebrata, aliis necessariis non obmissis, accidencia horribilia, ut plures suffocacionem in quolibet morienti spectarent66. Spuma circa os notabilis et perseverans; nonnulli allegantes afforismum Yppocratis: “Strangulatorum et dissolutorum nondum mortuorum non refferunt amplius quibuscumque spuma fuerit circa os". Quatuor fortes persone tenuerunt certis ligamentis; nulla enim in isto fuit quies, sed omnium suorum membrorum motus et pedum et capitis fortis, ita ut, si liber fuisset, se ipsum adhuc interfecisset. Mens enim egrota fuit iuxta illum afforismum: “Quicumque plurimum dolentes non senciunt, hiis mens egrotat" nec potuit in memoriam deducere, se in tali periculo fuisse. Sed in pretorio, cum ad racionem rediit, se fuisse scivit; sed quo post hoc devenerit, ignoravit.

Item cum timuissent domini doctores, ne forte seculares potestates eundem secundario arriperent atque morti traderent, commissum fuit domino doctori Bartholomeo Stäbär, ut consules adiret regios, eosdem de casu informando, ut domini doctores protegerentur, si inquantum eis aliqua inferretur violencia; vellent enim domini doctores pro posse facere diligenciam, ut in vita conservaretur. Volebat enim lictor in curru eum interfecisse, cum plene eum mortuum non intellexisset, si dominus doctor Stabär et Mag. Caspar Kalbsor non fuissent nimis istum ammonendo.67[fol. 10r]