[12. Februar 1518] Feria sexta, 12. videlicet Februarii, habita est congregatio facultatis propter quatuor sequentes articulos.

Primus: Dominus doctor Leopoldus Iordon petit admitti ad facultatis consortium. Et accepto ab eo iuramento de observandis admissus est. Dedit cantarum potus Hypocratici. Secundus: quia dominus vicetenens propediem petiturus est Cesaream curiam, ne ergo negocia nostra et privilegja ita sepulta maneant, facultas quomodo ulterius agendum sit, deliberet. Fuerunt statim electi quatuor doctores, scilicet doctor Wilhelmus, Entzianer, Vadianus et Iordon, et missi ad vicedominum, qui sue Magnificentie declaravere, quomodo Vuilhelmus Pesserer contra privilegia facultati a serenissimo nostro Imperatore gratiose nuper concessa practicaret, idque sepe dominis regentibus facultas personaliter et per supplicationes conquesta sit, sed hucusque frustra, quoniam prefatus Vuilhelmus practicaret ut antea, non attento decreto dominorum de regimine: “das er mit der practig soll styl ston". Respondit vicedominus, quia et ipse unus ex regentibus esset, quare contra acta eorum esse non possit, neque sibi liceat; suum tamen fidele et bonum esset consilium: facultas adhuc semel ingrederetur regimen petendo eorum Magnificentias, quibus Cesarea Maiestas in privilegiis nos conservare singulariter mandasset, facultatem tueri et defendere digneantur [sic!] contra hominem illum indoctum, qui contra Cesareum practicaret privilegium; quod tamen si magnifice eorum dominationes facere non vellent, facultas cogeretur recursum habere ad Imperatorem etc. Hec doctores facultati refferunt. Cui placuit, ut sequenti die conveniremus omnes in templo divi Steffani et visitaremus dominosregentes. [fol. 82r]

Tertius articulus fuit propter quendam magistrum scolarem medicine nomine Richardus Noctivigil Coloniensis, qui a facultate duo petiit. Primo: quoniam illius esset animi, quod vellet deleri ex matricula universitatis, cuperet scire, anne denique posset lectiones audire medicinales.

Secundo: Dominus doctor Symon Latz promiserat et resumere et docerepracticam atque etiam curam morbi Gallici ea condictione, ut cum aliquando fortuna sibi pinguior redderetur, sub pena excommunicationis sibi daret 24 florinos, quam condictionem sive hoc pactum doctor Symon sibi servare nollet, quapropter facultati conquereretur et peteret, ut cum prefato doctore agerent, pactum servaret.485

Ad primum facultas respondit, quod lectiones essent publice et Principis, quare eorum non esset aliquem excludere a lectionibus; etiam si mechanici intrarent, non prohiberentur; quapropter ipsum non prohibere vellent a lectionibus, nisi rector vel universitas eum prohibuerit.

Ad secundum conclusit facultas, quod practica ultima et particularis, videlicet scribendi modus et componendi receptarum non resumetur amplius nisi baccalaureis medicine vel scolaribus, qui per aliquot annos theorice medicine insudarint, cum dispensatione facultatis, et placuit, quod statutis inseratur. Doctorem ergo Symonem, ut practicam sibi resumat iuxta pactum, non astringat; si autem magister quid iuris erga eum habeat, apud magnificum dominum rectorem et eius venerabile Consistorium querat.

Quartus articulus: Cirurgici et balneatores hic Vienne nobis aliqua in presentia civium facultati deputatorum proponere cupiunt. Concludunt patres, quod audiantur, et elegerunt dominum doctorem Vuilhelmum, Prutenum, Entzianer, qui eos una cum decano in presentia civium audiant et facultati proposita ab eis refferant.

Quintus articulus: Cui ad mutationem estivalem, festum videlicet sanct Georii, domus facultatis sit locanda. Placuit facultati, quod locaretur alicui pro certo censu, et stuba inferior servaretur pro congregatione facultatis. Cum hec scriberem, doctor [fol. 82v] Ioannes Pylhamer convenit me et petiit sibi domum locari, promittendo facultati stubam inferiorem tempore congregationum, et per omnia domum eo modo habere vellet ut doctor Ioannes Neuman. Et consensu seniorum decanus addixit ei domum in eo censu sicut Neuman habuit, et pro structura accomodet facultati 50 florinos, sicut etiam idem Neumanfecit.