[9. März 1518] Ob sequentes articulos die Martis, que fuerat 9. dies Marcii, convocata fuit in edibus medicorum facultas.489

Primo dominus decanus proposuit facultati, quomodo Sebastianus Winderlin, utriusque iuris licentiatus, causarum universitatis in curia Cesarea sollicitator, expensis careret pro subsidio, ad universitatem litteras dedisse, propter quod dominica precedente Oculi magnificus dominus rector, convocato Consistorio talia proposuit. Cui placuit, quod omnes decani facultates congregarent, et induceret quilibet facultatem suam pro subsidio dando universitati, que in erario deficiat, ne idem nominatus universitatis orator in scandalum suum et universitatis redire cogatur cum maxima adversariorum nostrorum gloria et triumpho.

Concluditur per facultatem, quod dominus decanus dicat et respondeat nomine facultatis magnifico domino rectori, facultatem non habere in erario peccuniam, quare per capita non possit neque velit contribuere; tamen placeat facultati, quod universitas accipiat mutuum et census, quos habet, accomodanti tribuat. Tamen si sollicitator rediret cum expeditione, facultas medica tunc etiam velit pro condictione sua respectu aliarum facultatum iuxta proportionem et iustitiam distributivam universitati subvenire in expensis etc.490

Alter articulus erat propter doctorem Vadianum, qui petiit sibi collocari domum medicorum, cui decanus articulum formaverat, eo quod uxor doctoris Ioannis Pilhamer resignaverat domum, petiitque, si posset fieri, domus alicui honesto viro collocaretur; quod si non posset fieri, censum vellet dare. Formato iam articulo, domina Pilhamerin, vocato pedello, domum ne alicui decanus collocet, precatur. Conclusum fuit ex pluralitate votorum, quod uxor in absentia mariti non habuisset resignare domum, quam deliberato animo ipse conduxerat. Quare doctori Pilhamer fides per decanum addicta servanda sit, et doctor Ioannes Entzianer pro annuo censu fidem fecit. [fol. 84r]

Formatus etiam erat articulus propter statuta per facultatem concepta et per doctorem Vadianum in debitum ordinem et latinum redacta. Et placuit facultati, quod antequam confirmarentur, mitterentur ad singulos doctores, qui reviderent; demum in proxima congregatione facultas deliberet, an confirmanda venerint.

Exposui in hac congregatione pro vino veteri et novo ac panibus 7 cruc.

Finita congregatione decanus rectori conclusionem facultatis insinuat, qui certe multum admirabatur petiitque, ut ego decani officium agerem, facultatem rursus adhortarer, ne universitatem in ultimo iam periculo relinquerent, et quod cetere tres facultates conclusissent, facultas medica tamquam quarta rota eis assisteret.

Ad petita ergo et consilium rectoris iterum convocati sunt singuli doctores ad491ecclesiam divi Steffani, et post longam deliberationem doctor Wilhelmus Puelinger et doctor Ioannes Pryß una cum decano mittuntur ad Consistorium rectoris ea hora congregato [sic!], quibus data est potestas, ut si cetere facultates in universitatis subsidium aliquid contribuerint, nomine facultatis etiam spondeant iuxta proportionem ceterarum facultatum. Cum ergo decanus theologie nomine sue facultatis promiserit 16 flor. Ren., decanus iuris 12, nos 8 prestare pollicebamur. Facultatis autem artium decanus 30 tal. offerebat, et ita conclusum est, quod singuli decani pecuniam promissam crastina luce rectori sigillatam mittant.

A domina ergo Pylhamerin 10 flor. Ren. ad futurum accepi censum et misi rectori cum pedello 8 iuxta promissa.

Exposui 6 cruc., quos dedi famulo magistri civium, ut inhiberet tres empericos et curatores morbi Gallici cum Pfeffer habitantes tunc temporis. [fol. 84v]