[7. Juli 1532] 7. deinde Julii, — tantum enim temporis intercesserat —convocatis rursum doctoribus litere proponuntur per decanum toti medicorum collegio a clarissimo viro Georgio Tannsteter ex Oeniponto misse. Quibus accurate perlectis auditisque haud sine parvo quodam animi stupore insolitum ac a nemine nostrum expectatum responsum, presertim quod confratri nostro amice simul et humaniter scripseramus, doctores audivere. [fol. 118r]

Quapropter insimul omnes, nec immerito quidem, dolebant, quod prefatus Tansteter, confrater et collega, multo aliter facultatis literas interpretatus fuisset longeque alio apud semetipsum, quam quo nos scripseramus animo atque intencione, easdem intellexisset, atque ob id haud aliter nobis, quam si iniuriati ei essemus, quod Deus avertat, minus humaniter et amice rescripsit. Et cum inter legendum alter alterum intueretur, nemo satis mirari potuit, undenam et quibus ex causis motus Tannstetter facultati nobisque, qui tamen eum ut collegam ac fratrem agnovimus, usque adeo excanduerit. Erant enim litere propemodum biliose et plus iusto acerbe. Proinde facultas respondere ad illas renuit superseditque atque in omnem rei eventum, ne partibus temporum iniuria aliquando obesset, omnia acta scriptaque uno in fasciculo simul colligata hucusque custodivit servavitque, nec quid amplius egit, non obstante Perlachii ad sui promocionem desiderio.

Restabant aduc in numerata pecunia 6 flor. 22 den. Statim dominus decanus accepit subsequens. [fol. 118v]672

[1532/ 1533]