[11. März 1533] Die 11. Martii congregati sunt domini doctores, ut darent magnificis dominis de regimine instructionem in scriptis super articulo supplicationis domini doctoris Ioannis Pilhamer, superintendentis universitatis, quem 7. die Martii facultati obtulerat. Munus hoc domino seniori doctori Ioanni Enzianer et domino doctori Leopoldo Iordano exequendum competebat, nam dominus doctor Ioannes Gastgeb tum aberat, et duo doctores reliqui, quia in articulo supplicationis nominati erant, sua vota conferre non debebant. Ea ipsa instructio die 13. Martii per famulum facultatis magnifico domino cancellario oblata est.

In ea congregatione empiricus supranominatus per dominos doctores auditur et examinatur. Qui minus idoneus compertus est, chirurgus enim non erat atque omnes morbo gallico laborantes, qui se cure sue credebant, vino infusionis coloquintidis ex equo purgabat et violenta fumigii [fol. 120r] cura affligebat. Ea artis sue summa erat, nec aliud, ut ipsequoque coram facultate fatebatur, novit. Eapropter domini doctores ei seriosius prohibuerunt hanc artem suam in urbe Viennensi exercere, eidem plurimas enumerando rationes, ob quas merito repelleretur, et pecunia, quam pro examine deposuerat, ei redditur.