[6. November 1534] Wir haben zeittung, wie iezundt disen abent von dem general haubptman der herschafft auff irer armada brieff sind zukhumen, das nemlich des Andre Dorianepoto Rhodys sol erobert haben, dann jr wenig volck darin gewesen, und seer ausgestorben. Item das des Barba Rossa, des turckeischen kheyser hauptman, so vergangen tag ein sollichen wust zuFundi im khunigreich Neapolis begangen, und nachmals den khunig von Tunis698in Barbaria vertriben und ein andern solt eingesacz haben, das sein armata per fortuna an der spicz de Barbaria auff land geworffen und alle zutrimert sein solle, derhalb di herschafft zu hannd unnd ernstlich ein haimlich ratt berueffen lassen unnd bis hernach darin siczen. So hatt der Turck nit vil gegen dem Sophi eröbert, ja dermassen wider abzogen, vnnd als man sich versiecht, disen winter zu Aleopo hausen werdt; zu Constantinopel verpotten bey dem pfall, das niemancz auff den gassen pläczen, und indert der stat in samlung und circel mit einander reden sol, khain schaw-, khain khriegspferdt halten müg, der zu Constantinopell beliben sey oder alda zu beleiben verordnet, und das nit mer dan vier cristen in ainem hauss bay ein andren wonen mugen. Es sol etlich tausent heüser zu Constantinopel verprunnen sein etc. Solliche neu zaittung sind, wie vor gemelt, von Venedig her geschribenn. [fol. 124r]

Es sind auch im November vorhin nit erhörtt zeittung von Münster khumen, einer neuen religion unnd secten wider alle vernufft unnd erberkhait, so ver der sach also ist, mit selczam manir angehebt unnd vyl volcks anhennig gemacht, auch propheten ausgeschickt vnnd einen khunig erwelt, darvon ich nit weitter schreiben wyl. Gott wende699alle ding zum besten unnd erleucht die herczen der menschen zu einigkhait in einem rechten glauben Amen.

[Dezember 1534] Im December des 1534. jars ist ein venedigische pottschafft zu khunigklicher Maiestat gen Wienn ankhumen, unnd, als man sagt, drey jar von Venediger am hoff zu bleiben, abgefirtiget. Fuit autem legatus ipse de familia Contharin. Es sind auch khumen gesandt vom hirczig von Wirttenberg unnd landtgraffen von Hessenn nach irer instruction mit khuniglicher Maiestat zu handlen, qui honeste accepti ac munerati elapso fere mense700, abierunt. Es sind auch vor und nach vyl ander neu zeittung fürgefallen, die ich von khürcze zu schreiben underlass.