[24. Jänner 1596] Die 24. Januarii anno 96 duo excelsi regiminis [fol. 363r] decreta ex consistorio venerabili ad facultatem delata dominis doctoribus collegii nostri sine mora transmisi, in quorum primo serenissimi principis Matthiae archiducis Austriae nomine facultati injungitur, quam primum serio deliberet, num certis et quibus mediis praecaveri possit, ne febres populariter nunc grassantes contagiosae magis ingruant aut ulterius rependo infectionem ipsam invehant adeoque si commodum videatur, germanicus tractatus ejusmodi praeservativa continens in totius rei publicae commodum typis edatur.

Concluditur, ante annos aliquot non solum in eadem materia editum germanicum libellum revidendum, corrigendum et augendum, denuo recudendum sed et dispensatorium pro Viennensibus et aliis Austriaci districtus pharmacopaeorum officinis per facultatis doctores conscriptum edendum, quod ut citra facultatis sumptus et commodius fieri queat, venerabile consistorium informandum, privilegio pro typographo praefati libri per quinquennium alibi ne imprimantur ex aula opus esse, quod per me factum.

Libellus ille germanicus opera dominorum doctorum facultatis, venerandi praesertim senioris nostri revisus, correctus, auctior plerisque in locis redditus et praefixa ad magnificum et strenuum nobilemque virum dominum Wolffgangum Unverzagt sacrae caesareae majestatis a consiliis imperialibus etc. scripta epistola dedicatoria in ordinem redactus, typis tamen nondum commissus est, sed reservatus in actis hujus decanatus.688

Altero vero ad facultatem misso decreto proponitur, si forte aliqui e nostro medio tempore fugae, bona sua mobilia magni praesertim nominis, paratae pecuniae summam extra territoria sacrae caesareae majestatis et Austriae archiducum alio transtulissent, illi sine discretione denominentur, mediaque certa, qua ratione ejusmodi bona reduci queant, matura deliberatione habita, justa insuper689 informatio [fol. 363v] consistorio venerabili quam primum offeratur, quod per me, prout res sese habebat, factum et scripto consistorium venerabile informatum est.

Hoc ipso tempore libellum supplicem domini Mag. Tobiae Pirichbachii medicinae studiosi, quo petebat nostra cum venia illi liceret adjunctas theses publico examini committere, dominis doctoribus transmisi, qui benigne consenserunt.