[22. August 1603] Die 22. Augusti cuidam scribae pro discribendis actis facultatis in causa pharmacopoeorum dedi 1 flor. 2 sol.

Eodem die excelsi regiminis decretum B., quo jubemur ad 25. hujus mensis in causa pharmacopoeorum ibidem comparere, ad me transmittitur.

Comparuimus itaque coram deputatis sacri regiminis commissariis, qui erant magnifici nobiles et excellentissimi viri domini domini N. de Friedeshaimb, Matthias Pühlmair et Stephanus Schlachter, ego Benedictus Perger pro tempore decanus, una etiam D. D. Joannes Petrus Magnus et Guido Anthonius Scarmilionius, nomine facultatis nostrae.

Ibi inter caeteras difficultates etiam articulus novae reformationis de non dispensandis et praeparandis tum externorum doctorum tum aliorum quorumvis illegitime in hac civitate practicantium pseudomedicorum receptis et ordinationibus propositus examinatus et tandem in hunc modum definitus et expeditus est:

Ut decanus medicae facultatis in posterum singulis angariis tam facultati legitime incorporatorum quam aulicorum praxim hinc libere exercendi potestatem habentium dominorum doctorum, certum unicuique pharmacopaeorum in suam seorsim officinam mittat catalogum, quorum rescripta propriis tamen [fol. 425r] illorum nominibus semper subsignatis pharmacopoei dispensare, praeparare et conficere poterunt, praeterea vero, tenore caesareorum nostrorum privilegiorum nemini medicandi artem illegitime clam vel palam hic exercere volenti. Id quod pharmacopoei se libenter facturos benevole receperunt quidem, minime tamen hactenus praestiterunt.