Universitätsarchiv Wien, UAW Cod. Med 1.4 AFM 1558-1605
[29. März 1566] Tertiam congregationem habui 29. Martii, in qua consultatum fuit duobus articulis.
Primus fuit de superintendente universitatis electo ex nostra facultate praesentando rectori et consistorio. Postquam acta retoratus D. Andreae Dadii et aliorum revisa erant et copiae eorundem a notario universitatis habitae, in quibus officium et locus sessionis superintendentis universitatis describitur. Quia superintendens caesareus antea in consistorio dixerat, se nescire, quapropter superintendens universitatis, minus vero, quae ipsius sessio et quod officium illius esse debeat, ceterique consistoriales etiam dubii erant, in hac congregatione conclusum fuit: Quod magnificus dominus rector et consistorium denuo debeant admoneri de superintendente universitatis ex nostra facultate electo. Et si ipsum rector et consistorium non receperint, hac de re cum reliquis facultatibus consultandum, quia de ipsarum quoque honore agatur. Demandassem executioni hoc facultatis propositum, sed paucitas consistorialium in ultimis consistoriis me deterruit.
Secundus articulus fuit de pharmacopolarum novo dispensatorio conficiendo, examinando et extrahendo ex omnium ipsorum dispensatoriis et velut in unum corpus dispensatorii redigendo. Conclusum fuit, ut quae adhuc desiderantur a pharmacopolis conscribenda et exhibenda ab ipsis requirantur et ulterior deliberatio ad [fol. 61r] sequentem congregationem differatur.
Huic conclusioni satisfactum est et sequenti decano pharmacopolarum scripta omnia per me tradita.
- Acta Facultatis Medicae Universitatis Vindobonensis Vol. 4, Leopold Senfelder, 1908
Acta facultatis medicae Vindobonensis 1.4.152, in: Monasterium.net, URL </mom/AFM/1.4.152/charter>, accessed at 2024-05-05+02:00
The Charter already exists in the choosen Collection
Please wait copying Charter, dialog will close at success