[9. Februar 1568] IX. die Februarii D. D. Christophorus Widman petiit ad consilia et emolumenta facultatis admitti. Admissus est transacto videlicet tempore decanatus, quo ipse dum in facultate artistica fungebatur.

In eadem congregatione ad relationem a pedello nomine facultatis factam venit D. Ladislaus repetens a facultate acta posteriora sui decanatus ad facultatem deposita, quo ea in actorum librum referre possit. Res haec a dnis doctoribus, qui novem praesentes erant ipso semoto deliberata est ac unanimi voto conclusum, ipsi praesenti in primis exprobrandam inobedientiam et contemptum245, quem facultati jam saepius exhibuit, deinde indicandum, acta decanatus sui ad evitandas contentiones et rixas esse jam ex officio inscripta; demum monendum serio, ut in posterum acquiescat et se obedientiorem et modestiorem erga facultatem exhibeat, ne graviora in ipsum statuendi facultas causam habeat. Haec fere nomine facultatis ipsi a me relata fuerant. Ipse indigne ferens, acta sua esse inscripta et oretenus et scripto, quod dum in sinu gestabat protestatus est, se haec acta inscripta pro suis non agnoscere nec velle, ut nomen suum his praefigatur. Verba protestationis suae scripta haec fuerunt:

(Patet N° 26). [fol. 79r]

Quandoquidem video haec acta ex meis mutilatim decerpta meque inscio et invito in librum actorum praeter morem et consuetudinem majorum nostrorum relata atque inscripta esse, id vero ad nominis mei contumeliam, posterorumque meorum existimationis laesionem ex professo spectare videtur, quapropter matura deliberatione habita solemniter coram excellentiis vestris protestor, me ob relatas causas haec acta pro meis non agnoscere neque nomen meum illis praefigi unquam perpessurum esse, ejusque causas sufficientes apud magistratum suo loco et tempore requisitus offerre nunquam detrectabo.246

Ladislaus Stuff M. D. m. p.

Oblato hoc scripto jussus est expectare responsum. Noluit, sed abiit.

Caeterum cum plurima contumeliose in ista protestatione adversus facultatem scripserit, adeoque jam multis modis totam facultatem offenderit, dni doctores, qui novem praesentes erant undecima die hujus mensis matura deliberatione habita, unanimi voto ac consensu D. Ladislaum247 Stuff excluserunt, eousque, donec se humiliando veniam mereat.