[30. April 1577] Nos Decanus et Facultas Collegii Medicorum in Academia Viennensi511 lecturis S. P. dicimus. Paulus Fabricius Laubensis bonarum artium Magister, natus loco et parentibus honestis, Noriberga a Romanorum Rege Augusto Ferdinande etc. huc Viennam anno salutis MDLIII. accitus, Mathematumque Caesareus Professor constitutus, cum hic et alibi in publicis Gymnasiis justo tempore Medicas lectiones audiisset seque in omnibus iis, quae ad Medicinam faciunt, studiose exercuisset, denumque hic ad statutorum regulam nulla re neglecta disputasset, examina subiisset, erudite et apte in examinibus respondisset, honesteque et pie vixisset ab inclyta Facultate Medica, Decano tum temporis D. Michaele Spitalero, Academiae Viennensis Reverendissimo Cancellario commendatus, ab eodem bonis (ut vocant) novis auctus, paulo post succedente Decano Spectabili Ludovico Kunig Doctore ab eo ipso Domino Cancellario Licentiatus in Medicinae gradu publice in templo D. Stephani Viennae in frequenti ac celebri optimatum omnis ordinis concessu, praesentique studiosorum Academiae et multorum civium corona, solenni ritu ornatus, eodemque die ac consessu a Magnifico et doctissimo viro Domino Francisco Emerico Medicinae Doctore, publicoque Professore, Consiliario Regio, [fol. 237r] Medicinae quoque Doctor adhibitis solennibus ceremoniis ac ritibus Anno 1557 die --- mensis --- creatus ac renunciatus est.

Haec quamvis sic in Actorum nostrorum librum relata sunt, petenti tamen nunc Paulo Fabricio Medicinae Doctori, Caesaris Mathematico libenter his literis descripta brevissime (hoc enim sic fieri ipse cupiebat) communicare voluimus, ut virtutis, vitae honeste actae, eruditionis et gradus Doctoralis in arte Medica, quem legitime apud nos consecutus est, nostrum testimonium de ipso extaret: et quamvis virtus seipsum commendat, utile tamen Reipublicae honestum denique omni modo judicamus, Collegiorum testimoniis quoque eos, qui in Academiis titulos et gradus bonorum propter literas512 et virtutem consecuti essent, ornari et quasi muniri, ut et alii, qui ordine promotorum Doctorum opera uti volunt, quibus fidere possint ac debeant, norint. Huic autem nostrarum literarum testimonio nostrum inclytae facultatis sigillum in evidentiorem fidem subjecimus.

Datae Viennae Anno 1577 in profesto Apostolorum Philippi et Jacobi, cum jam ipse ante 20 annos titulum hujus gradus accepisset et interea Medicinam fecisset. Vale bone lector. [fol. 237v]

Exacto tempore semestris mei decanatus resignavi officium et electus est in locum meum decanus votis dominorum doctorum post exactum suum rectoratum D. D. Georgius Waltherus serenissimi archiducis Ernesti medicus.

Accepi a praecessore meo ladulas 2 magnas, 1 parvam, sceptrum cum libris statutorum et ordinationum. Ea omnia tradidi sucessori meo.

Rationes pecuniariae sic habent:

Ego accepi a D. D. Benjamin Löbschütz 4 flor. 43 cruc.;

ab eodem propter examinatum balneatorem 3 flor.;

D. D. Lubanus admissus ad consilium facultatis dedit 45 cruc.;

dominus Adamus Bretterschnecker post examen dedit 15 flor.;

Christophorus Heincelius inscriptus dedit 15 cruc.;

D. D. Bretterschnecker admissus ad facultatem dedit 45 cruc.

Facit: 24 flor. 28 cruc.

Ego expendi in distributione post examen 12 flor.;

pedello stipendium 2 flor. 20 cruc.;

pro collatione in prima congregatione 15 cruc.;

pro campanella 12 cruc.

Summa: 14 flor. 47 cruc.

Quae deducta a superiore summa relinquunt: 9 flor. 41 cruc.

Tradidi successori. [fol. 238r]513