[8. Dezember 1588] IV. Congregatio VIII. Decembris. Congregata per me facultate haec tria sequentia proposui:

Primum erat de quibusdam agyrtis et circumforaneis impostoribus quorum schedas publice affixas per pedellum refigi curaveram. Et inter illos quidam nomine Joannes Steinweiß von Langen Loys Austriacus per pedellum citatus coram facultate comparuit. Hic cum de quibusdam morbis obiter saltem interrogaretur quos in sua scheda publice affixa se curaturum impudenter jactitabat respondit se schedam affixam nec composuisse nec curationes illorum morborum didicisse unquam habere se tamen quasdam receptorum formulas in multis probatas nugabatur. Tandem cum hic adeo ineptiret a facultate est dimissus cum illa tamen comminatione quod si inposterum affigeret [fol. 301v] aut in curationibus istis quicquam attentaret meritas debitasque a facultate poenas sibi esse expectandas.

Eadem quoque congregatione tres alii circumcelliones per pedellum itidem citati una comparuerunt quorum nomina haec sunt:

Daniel Rosinus von alten Brandenburg inn der Marck.

Martin Lochman von der Landshutt in Schlesing ein Steinschneider.

Zacharias Leibiger von Görlitz aus der Schlesing ein augenartzt und Steinschneider.

Hi tres modo denominati cum redarguerentur quod insalutata facultate nostra publice affigerent antequam facultati ut moris est sese sisterent et examen solitum subirent responderunt se ad hoc faciendum promtissimos fuisse modo a civium magistro hujus rei gratia essent admoniti.

Cum ergo et hi dimissi essent facultas conclusit consulem si simile quid contingeret esse reprehendendum commonendumque ut hujusmodi impostores quemadmodum in aliis bene constitutis rebus publicis observari solet inposterum facultati sistat antequam in publico res suas divendant aut ullam operationem manualem instituant.

Secundum quod tum proponebam erat de Andrea Ganazi barbitonsore aufm Kolmarck cujus receptas contra praestitum facultati juramentum patientibus ab eodem praescriptas D. D. Perger in pharmacopolio Joannis Heckheler invenerat. Hic cum ob id graviter accusaretur tandem ea lege est dimissus quod si secunda vice in simili re deprehenderetur facultatem literas testimoniales sui examinis ab eo repetituram et poenam debitam irrogaturam.

Vocatus etiam tum fuit quidam apothecarius nomine Poppo Mueller inn der Karnerstrassen qui similiter praxin medicam exercuerat. Sed ut est homo arrogans et superbus antequam facultas modo denominatos a se dimitteret et cum praedicto Poppo Mueller colloqueretur indignabundus clam discessit. Quem tamen alio tempore graviter esse increpandum facultas conclusit.

Tertium et ultimum in hac congregatione propositum erat de facultatis dispensatorio imprimendo quod propriis sumtibus sese praelo submissurum aliquoties Antonius Rowitz [fol. 302r] pharmacopola promiserat. In quam quidem rem facultas consensit ita tamen ut prius revideretur et excelso regimini pro approbatione offeretur.